Tarèka, DIMADURA.ID – Bânnya’ jhâlân bârâmma carana arâbât na’-kana’ sopajâ oḍi’ bhâjjrâ è buḍi arè. Sala sèttongnga èngghi kodhu paratèn tor sabbhâr ngaḍhebbhi pola tèngkana na’-kana’ sè–tantona–abâ’na ghi’ bhuru tao ngabâs dhunnya.
Rèng seppo masthè opèn, ta’ bhusen mèsalla alatè otabâ ngajhâri na’-kana’ kalabân sèttong kajunèlan, terros ater ka kajunèlan-kajunèlan laèn kantos èpangghi; ponapa kèrana kajunèlan sè patot kaangghuy èpanthengngè kalabân bhârenteng sareng abâ’na.
Bâḍâ sèttong bughu bhâghus sè nerrangngaghi kadhiponapa tatengnger bâbâtegghâ na’-kana’ sè bisa ngater abâ’na oḍi’ bhâjjrâ è buḍi arè.
Kadhiyâ pon sè ètolès CNBC Indonesia, Rebbhu (27/3/2023), orèng Amerika Serikat (AS) anyama Margot Machol Bisnow nyerrat sèttong bughu kalabân bhul-ombhul “Raising an Entrepreneur”.
Ḍâlem bughu ghâpanèka, Margot ajhârbâ’aghi 5 tatengngerra na’-kana’ bhâkal oḍi’ bhâjjrâ è buḍi arè. Palèng bhunten, ca’èpon, 5 tatengnger ka’ḍinto bisa dhâddhi tanḍhâ kabhâjjrâânna.
Ta’ kor-sokkor nolès, bughu ghâpanèka èserrat aḍhâsar panalèktèghân wawancara ḍâ’ 70 rèng towa sè anḍi’ ana’ bhâjjrâ.
Ka’ḍinto 5 tatengngerra na’-kana’ bhâkal oḍi’ bhâjjrâ è buḍi arè:
Maos Jhughân: Pasèra se Nemmo Aqua?
1. Tarongghu (gigih)
Na’-kana’ ghâpanèka cè’ tarongghuna; bhârenteng, antheng (tak kenal kata menyerah) nalèka mèlè tor nantowaghi sèttong pokpara, kantos abâ’na mangghi jhâlân kabhâjjrâân.
Mon ta’ dhâlâ asèl, na’-kana’ ghellâ’ ta’ ambuwâ, terros nyarè tarèka barâmma cara sè ollèya asèl. Abâ’na sabbhâr, ta’ toman kènè’ atè maskèya pon lako èpanglo bân orèng sè bâḍâ è seddhi’na.
Sèttong conto, Jonathan Neman nyamana. Orèng bârâ’ panèka bhâjjrâ oḍi’na polana kabhârentenganna. Li-bâliyân ngoddhi adhâghâng molaè ghi’ asakola SMA kantos akuliyâ. Sèttonga taḍâ’ sè asèla, rogi malolo.
Namong ca’èpon rèng Madhurâ: Kabajhenganna tao nolong abâ’na. Lâ.. polana ghânèka, nalèka ampon totok asakola, Jonathan Neman pas majhâghâ Sweetgreen neng è 900 kennengngan. Sweetgreen ka’ḍinto ropana bârung dhâghângan sè aghibâ tagline Salad Sadar Lingkungan (Salad Lèbur Alam)
“Sèngko’ sakanca’an terros ajhâlân. Ta’ aghibâ asèl (gagal), sèngko’ ta’ ambu, ngoddhi bân terros èyoddhi polè,” ca’èpon bâkto èsobâl wawancara sareng Bisnow.
“Sèngko’ ollè ta’ pènter paḍâna sè laèn, tapè sèngko’ kodhu lebbi bhârenteng bân tarongghu”.
2. Lako terro taowa (penasaran)
Penasaran ca’èpon rèng Malaju, Curiosity ca’èpon rèng bârâ’ (Inggris). Na’-kana’ sè lako atanya artèna na’-kana’ ghâpanèka tèngghi curiosity-na.
Na’-kana’ jârèya ta’ pèra’ lako terro taowa ka bhârâng anyar sè ètangalè otabâ sè ghi’ ta’ katèngal, bhâli’ jhughân bhârenteng kaangghuy onèng kadhiponapa bhârâng ghellâ’ bâḍâ dhâddhi mara sè ètangalè bân abâ’na.
Tania Yuki majhâghâ Shareablee, sèttong perusahaan analitik media sosial. Abâ’na ènga’ ghi’ ngoḍâna toman èntar ka toko suvenir kellas attas, râng-bhârâng èngghâḍiyâ larang sakabbhinna bân ta’ kennèng sèddhing.
È yâḍâ’na bâḍâ tolèsan: TA’ OLLÈ SÈDDHING! Tapè bân Tania Yuki, sabâḍâna sè ètangalè èsèddhing kabbhi!
Pramuniaga sè ajâgâ nagghuk tor ngala’ bhârâng sè ètegghu’ Yuki. Yuki mèkkèr abâ’na bhâkal ollè ḍhinḍhâ otabâ okoman, tapè eppa’na pas ngoca’, “Jarèya pèra’ terro taowa, mon bâḍâ sè rosak, engko’ sè majârâ,” ca’èpon.
Maos: Sumenep Kota Keris, Bhâkal Karè Nyamana tho’
3. Anḍi’ pangaterro (Hasrat)
Bisnow atotoran, na’-kana’ bhâjjrâ biyâsana lako nemmo bhâi sè èkalakowa. Bâḍâ è jeḍḍing, sabâḍâna sè ètangalè è ḍâlem jeḍḍing èkala’ ghâbây dhi-oddhiyân. Sabun èlobângè, sikat èpangosso tor-motoran bân laèn samacemma.
Abâ’na lebbi senneng ngoddhi hal-hal anyar kaangghuy nyothok pangterrona ètèmbhâng ollè ghir-ghighirrâ rèng towana polana akaton mellerra.
Robert Stephens contona. Stephens, ca’èpon Bisnow, conto orèng sè bisa ngobâ pangaterro salagghi’ ngoḍâna dhâddhi sèttong kabhâjjrâânna tèmpo dhibâsa.
Nalèka nèddhâ’ omor 24 taon, Stephens majhâghâ perusahaan reparasi kalabân merk Geek Squad. Ta’ abit, perusahaan ghâpanèka èjhuwâl ghân US$3 juta.
Rèng towana Stephens ta’ toman bhusen nyojjhu pangaterrona tor parcajâ jhâ’ abâ’na mampo marampong kalakowan pèlèyanna dhibi’.
4. Ngeppas bân amolaè (yakin dan action)
Ngeppas maksoddhâ yâkin nalèka motossaghi sèttong parkara kaangghuy abâ’na dhibi’.
Ècontowaghi, nalèka Paige Mycoskie neddhâ’ omor 20-an, kaè bân nyaèna abherri’ barèsan ka Paige US$100 juta, teppa’ bâkto molang arèna.
Paige ngeppas, pèssè ghellâ’ èghuna’aghi kaangghuy nyokobhi sadhâjâ kabhutowanna oḍi’na; mellè messèn jhâi’, pas ambu ḍâri kalakowan sè sabellunna.
Abâ’na pas jhujhuk amolaè ḍesain cem-macemma bhâthèk angghuyyâ manossa. Ta’ bit, Paige anḍi’ merk pèsyen dhibi’, anyama Aviator Nation.
Taon 2021, perusahaanna Paige sè anyama Mycoskie pon ngasèllaghi omset US$110 juta è sabbhân bulânna.
Maos: Polowan Conto Paparèghân Madhurâ Ḍubhâris
5. Enḍâ’ ka risiko
Sabellunna kaonang mènangka presenter TV neng è acara “Dhani Tackles the Globe”, Dhani Jones saongghuna dhâddhi gelandangnga NFL.
Ta’ ambu ghun kaonang mènangka presenter TV, Dhani Jones jhughân majhâghâ Qey Capital, sèttong perusahaan ekuitas swasta.
Dhani Jones ta’ toman ngèdhebbhi caca sè ta’ parlo ḍâri lowar. Apa sè dhâddhi pèlèyanna, Jhones terros ajhâlân.
“Dhâghâng rèya ta’ toman tako’ ka risiko, kabâdâân sè kèra ambhâbhâjânè ḍâ’ abâ’na,” carèta èbhuna ka Bisnow.
“Bânnya’ na’-kana’ sè tako’ kaangghuy adhina apa sè la èkaollè bân ngallè ka sè laèn sè èkèra lebbi bhâghus. Ongghuna sènga rèng towana namennaghi kaparcajâân ka abâ’na, na’-kana’ ghellâ’ bhâkal bângalan nètè kaoḍi’ânna dhibi’.”
