7 Contoh Puisi Bahasa Madura karya Soemarda Paranggana

MADURA.ID – Kadang kita kesulitan untuk menulis puisi Bahasa Madura dan mencari contoh puisi pilihan yang bagus dengan berselancar di Mbah Google.

Lama berselancar dan beberapa kali membuka situs-situs yang memuat puisi Bahasa Madura tetapi merasa tidak sesuai harapan.

Walaupun bukan karya para penulis atau penyair besar, barangkali 7 contoh puisi bahasa Madura berikut dapat menjadi gambaran untuk puisi-puisi yang akan atau sedang kalian cipta.

MANDHI

Jabblong, ya’ eya’
Jabblong!

Pak katapak, katapak
Gadibung!

Pak katapak, katapak
Gadibung!

Ya’ eya’, jabblong!
Ya’ eya’, jabblong!

Songay Gajam, 2018

ODE KA LANDAUR

Laa elala elala, e
Elala elala, e

Gunong temmong e dhadhana
Guwa candhak e bujella

Laa elala elala, e
Elala elala, e

Sadindak gan sadindak, tandu’
Sabai’ gan sabai’, selte’

Laa elala elala, e
Elala elala, e

Ajja’ duli gujur
Ajja’ duli nanjur
Salaggi’ soko gi’ ta’ ngonjur

Totosan, 4 November 2018

ESTO EBU

Ba’na cengkal, kacong
Esoro ka bara’ entar ka temor
Bila soko ban cethak padha ngalecer
Tabu’ ban mowa salbiyan kabbi mara jareya
Emma’ se kemma se mangga
Oreng towa se kemma se kellar
Nagenne kelbu’ dhadhana

Adhu kacong ate sengko’
Dhara sengko’, ora’ sengko’
Ja’ senga bisa eyontal, bango’
Maso’a pole ba’na kacong
ka dhalem tabu’

Bukkak e to’odda
Manda’na eyalleya ka to’ot dibi’
Lokana se anganga, ja’ bisa’a bali’ ebangngemma
/
Saka’dhinto. Tono ana’na
Rop-sorop are mole ka bengkona
Eyosong kanca ban tatanggana

Ebuna robbu
Eppa’na laggi’ entar nabbu

Totosan, 18 Desember 2022

SEDA SALERANA

Banne keng seda, meddem
Banne ebendhem, atamen
Mata paneka bureng, ta’andheng

Dhadhabunnepon nyolbu’, lebba’
Ta’ busen adulang aba’, sopaja enga’

Seda salerana
Sabban maghrib dhateng ngolok salam, nadhain tanang, dhang-ardhangan, li-baliyan

O, pasera enggi mandeng
Neng e bang-labang nyalendem

Sorop are cellep
Compet ate ta’ edhep

Angen taneyan ngelesser
Na’ poto dhu ma’ ta’ neser

O, Seda salerana
Banne malathe ro’om nyarendhem
Banne kembang babur etabur
Elong paneka nyergu’
Lembu’
Dhateng

Fatehaa dhu, Guste!

Jang-bajangan salerana
Semma’
Ngalembeng

Totosan, 19 Juli 2018 – 31 Desember 2022

BULAN BERTENG

Tase’ sorem. Sampan karem
Langkong tello polo taon abdidalem
Alarong. Nerrak petteng. Sajja barenteng
Napso paggun mathettheng
Roba-roba ngandheng. Barang-barang
Mancerreng. Nyarotheng!

Bulan berteng. Omba’ dhateng agulung
Lajar dhalem orong, tasellem
Tasellem dhu, Ajunandalem!

Bulan berteng
Omba’ dhateng agulung

O, Taresna! Taresna!

Sajja paneka: manggana gunong epekola
Langnge’ lowas ejungjunga

O
Kerana kerrong kenneng porak
Kerana ko’ong kenneng peyak, O

Saenggana kelbu’ edabu’ dhari sojud
Saenggana nyaba ngalto’, possa’
Daddi sabara’ala tase’
Ejutjut sabara’ala juko’

Bangkal, 20 Juli 2018-2022

PADDHANG BULAN

Ju’-toju’ nengnge amper
Paddhang bulan. Serdhang jalan
Lok-mellok e jauna

Tera’ malem. Mella’ dhaun. Mella’ bungka
Mardika mata dhari barna
Mardika ate dhari dunnya

Sapaneka tanang eyangka’a
Satenggi-tenggina. Kantos seba’ langnge’
Retta’ ondhem, namba’ du’ana

O
Mardika mata dhari barna
Mardika tengka dhari dunnya

Totosan,
Juni-Juli 2018

RA’-TERA’ TANA, LAN-JALANAN

Lan-jalanan ka Songay Bato
Badan ta’ kalowar jang-bajangan

Bas-abasan gilina aeng nganyo’ bu-rombuna
Dari olo ka onjur tanto
Dari mangkat kantos dhapa’ ka tojjuwan

Lan-jalanan ka Songay Bato
Sakejja’ sambi ajalan, aba’ tereddep
Ngen-bangennan..

Baramma? Baramma bila pon dhapa’
Onggu ka tojjuwan.

Baramma? Baramma mon
bu-rombu rowa ta’ laju lejjar
Sabellunna nyaba edabu’
Badan pon sanat ka koburan

Guste!
Agaribisan du’a paneka tanto
Ngen-bangennan, berra’ gedda’ essena omor!

Bangkal-Totosan,
22 Juli – 4 November, 2018

Demikian. Puisi-puisi tersebut lahir dari pengalaman, perenungan, lalu menuliskannya mengalir saja hingga menjadi satu per satu puisi utuh.

Setiap puisi, tidak selesai dalam satu kali penulisan. Sebagaimana tahapan penciptaan puisi pada umumnya, puisi-puisi tersebut ditelaah dan diedit hingga menurut penulisnya telah benar-benar matang sebagai PUISI.

Sekian. Semoga bermanfaat.

***