AMAÈN ḌUM | Bagian 1
Cerpen: Soemarda Paranggana
“Maḍḍhâ ocol thok-lanthogghâ, ta’ kèra ta’ nèngkong dhika marèna.”
Man Supat nantang Kè Asroyo. Kè Asroyo nyaot, “Ḍu ma’ ta’ maḍḍhâ pas ocol, dhika bhândhâr!”
Kaempa’an, Man Supat, Kè Asroyo, Reno, bân Sudâhlan amaèn ḍum neng è ghârḍu jhârâjâ. Sèngko’ bân Kè Musa dhâddhi jâ-lojâ, ghuna nèngghu, ta’ noro’ amaèn tapè noro’ co-ngoco bilâ la bâḍâ sè nèngkong li-bâliyân.
“Empa’ tello’,” Reno ngocol, ngoddhi ngala’ bâbâna maèn.
“Tello’ palak,” Sudâhlan macepplas ocolanna Reno.
Sabbhân malem ta’ tobâng, sè kampa pajhât dines dâteng amaèn ḍum neng è ghârḍu jhârâjâ. Ca’èpon, sopajâ bârungnga Rèno ta’ seppè. Sajjhegghâ dinessa sè kampa, taḍâ’ polè bâḍâ rèng kaèlangan sapè. Dhisa Totosan rammè.
“
Malèng! Malèng!
“
Malem jarèya malem Salasa, Pancabârâ Bâghi. È jhâlâu’ bâḍâ orèng lok-ologhân malèng. Tanḍhâna bâḍâ sapè sè èpakalowar.
“Bâ, bâḍâ apa, è.. Masè bâḍâ kasa’na rèng lok-ologhân malèng?”
Satekkem kartuna Rèno èpajhebblâs toron kabbhi. Sanalèka maèn bujâr. Man Supat sareng Kè Asroyo jhujhuk nyanḍhâk arè’ è songkèlla.
“Pateppa’, Ren.. È ḍimma, ra. Ma’ bhuruwânna, satèya malem Salasa Bâghi sambi,” ca’èpon Ke Asroyo.
Sè nyamana Man Supat lajhu manjheng sakalèngaḍâ’. Tabhâbhâjâ’ ajhângngo sènter so kerrèssa. “Ella ella, maju dhuli kèntarè, arowa’ masè ghi’ pagghun lok-ologhân,” saoddhâ Man Supat ka sè laèn.
“
Malèng! Malèng!
“
Maos Jhughân:
Bhenḍer ongghu, sowarana cè’ lantona, ḍâri jhâlâu’ pajhât kasa’na. Ra-kèra ta’ kosè jhâu ḍâri bengkona Tolha. Ḍu malemmanna bâriyâ, ri’-bhâri’, ra-kèra pokol satengnga sanga’an, pajhât bâḍâ orèng manca akalambhi celleng asongko’ tèngghi lèbât è aḍâ’ânna tang roma.
“Palèng pajhât kèng ghânèka, kaduwâ sareng kancana sè nyettèr,” sèngko’ akasa’ ka Kè Musa.
Man Supat, Sudâhlan, Rèno bân Kè Asroyo temmo la taḍâ’ è seddhi’ân. Temmo la ètangalè ngènḍing ka morlao’. sèngko’ bân Kè Musa dhuli nyosol.
Saḍâpa’na ka morlao’, ḍu ma’ Hamid temmo ngambâ’ è ghâr tèmoranna bengkona.
“Bâḍâ napè hah, ma’ kosè aju-bârunju nèntèng saḍâ’ jhung rajâ’ân? Bâḍâ napè!” Oca’na Hamid.
Ḍu palang ongghu, bâddhiyânna sè lok-ologhân malèng ghellâ’ sowarana Hamid, terro co-ngocowa Man Supat bân Sudâhlan. Pojhur Hamid ta’ ètangkèl bân Kè Asroyo sè nemmo Hamid.
“Bhuh, korang ajhâr ongghu bâ’na, Mid. Kèḍi’ bâ’na.. Sènga’ lâ, mon parkara bhâbhâjâ ajjhâ’ ghâbây ghâghâjâdhân. Korang ajhâr bâ’na!” Kè Asroyo nyenthak Hamid. Hamid dhuli asapora.
“O.. para’ bâ’na teḍḍhâsâ cèthagghâ jârèya,” oca’na Sudahlan ka Hamid. Hamid ghuna macèccèng bibir kacèrra, sambi macebbir ka Man Supat.
Bujâr. Kabbhi paḍâ abâli ka ghârḍu. Amolaè ngocco’ ḍum polè. Hamid noro’ acampo, aghântè Rèno. Seḍḍheng Rèno bân Kè Musa majhâghâ laèn amoso sèngko’ bân Kè Musa. Kabâḍâ’ân rammè polè. Akor polè. Ghântèng lojâ saghâlimpo’an.
***
Bulân è attas para’ bungkola. Tèra’ malem. Onḍem asèssè’ salèng tabâng bân sè laèn. Ngarapkap, tanḍhâ pareppa’na bânnya’ jhuko’ ngattas ngambâng ḍâri ḍhâsar tasè’.
Angèn tambâ lembu’ nyarepsep ka lang-tolang. Tanḍhâna bâkto la lèbât ḍâri kol ḍubellâs tengnga malem. Man Supat bân Kè Asroyo sè biyâsana salèng ghântèng lojâ molaè èsep ghân sakonè’.
“Ḍuh, malem la kana’, maḍḍhâ ambu bhâi lu kah, lagghu’ bâjâ sobbhu bulâ ghi’ ngarè’a,” Kè Asroyo madhilbhâs kardhu-kardhuna. Abit ongghu abâ’na nèngkong ècapo’ okom bâbâ’ânna Man Supat. Sè dhinèng Hamid ghuna mèsem ka Sudâhlan.
Ḍâri ghellâ’ mola, Hamid bân Sudâhlan pajhât apangara sè manèngkonga Kè Asroyo. Sè dhinèng Kè Asroyo ta’ apangrasa, jhâ’ abâ’na pajhât èkalako bân sè katello.
Ngala’ arè’ bân songko’na, Kè Asroyo lajhu pas bhubhâr ta’ akasa’. Ngènḍing ka bârâ’ lao’ molè ka bengkona.
Ḍum!
Bersambung… ***
Baca Juga:
