News, SUMENEP–Dewan Pendidikan Kabupaten Sumenep (DPKS) mokka’ bhuka sareng ca-kanca pers ḍâri pan-saponapan organisasi sè bâḍâ è Kabupaten Songennep, Madhurâ, Sennèn tangghâl 19 April 2023.
Lampa ka’ḍinto ta’ gun aropa lampa mokka’ bhuka, bhâli’ kalabân sèttong tojjhuwân moljâ, èyantarana kaangghuy makoko kasomaktaan bâḍâna DPKS Sumenep sè anḍi’ pèngaro mongghu kamajhuwân pendidikan neng è Kabupaten Songennep.
Sabellunna tebhâ adân maghrib (bhuka), acara èbukka’ tor èyèssè’è kalabân dialog antara pongghâbâ DPKS sareng polowan ca-kanca jurnalis, lerres neng è Gedung Ki Hajar Dewantara, Kolor, Sumenep.
Lora DPKS Sumenep, Mulyadi aḍhâbu, akhèr-akhèr ka’ḍinto, bâḍâ pan-saponapan pokpara korang beccè’ sè dhâddhi tropong panalèktèghân salèrana bisareng ca-kanca ḍiwân laènna.
Sè ka’ḍimma, ca’èpon kalabân bhâsa Indonesia, DPKS bhuto formula khusus kaangghuy naghen tor ngatasèn pan-saponapan kadhâddhiyân sè bisa apangghibât camok ḍâ’ robâna pendidikan Sumenep.
Maos Jhughân:
“Ampon ta’ kasamaran, pan bilânna ka’ḍissa’ èpangghi’i kasus asusila ghuru ḍâ’ morèddhâ. Bâḍâ kasus polè ghuru tabhârusok ka paham radikalisme, tor laèn samacemma,” ca’èpon, tèmpo dialog sareng ca-kanca jurnalis.
“DPKS tanto ta’ bhâkal ajhâlân kadhibi’ân. Èngatasèn pokpara ka’dinto, DPKS bhuto sombhângan pamangghi ḍâri ca-kanca sadhâjâ. Èngghâl bhâdhân kaulâ sè akompol è aḍâ’ ka’ḍinto bisa ajhâlânnaghi kawâjibhân kalabân salpa’ tor samasthèna,” tegghes Salèrana, majhârna’ jhâjhârbâân sabellunna.
Bâkkèl ḍâri Persatuan Wartawan Indonesia (PWI) Sumenep, Syamsuni mator sèttong pangarep sopajâ silaturrahmi ka’ḍinto ta’ potosa kantos buḍi arè.
“Papangghiyân ka’ḍinto moghâ dhâddhiyâ labâng kaangghuy papangghiyân sè saterrossèpon. Sinergi DPKS sareng ca-kanca jurnalis panèka kodhu èpaterros, moghâ ta’ ghuna ghân samangkèn,” ca’èpon.
“Manabi bâḍâ parkara sè parlo èkarembhâk è buḍi arè, ngèrèng. Ngèrèng toju’ areng-sareng kaangghuy nyarè jhâlân kalowarra,” èmbu Syamsuni majhârna’ pamangghina.
Pamangghi laèn, Lora Komunitas Jurnalis Sumenep (KJS), Achamd Sa’ie, mator jhâ’ saongghuna DPKS sareng jurnalis panèka samè ngembhân sèttong kawâjibhân moljâ, èngghi ka’ḍinto kadhiponapa carana ngonjhuk tajhi tor ajhina pendidikan Sumenep.
“Ca-kanca jurnalis tanto bhâkal ajhâlân sambi nyorong pan-saponapan program sè bhâḍhi èjhâlânnaghi DPKS. Saka’ḍinto jhughân DPKS, moghâ ta’ kalèbhâ ḍâ’ ca-kanca jurnalis sè ngèrèng ḍâri bingkèng,” totor Achmad Sa’ie.
Pamangghi sè pongkasan dâteng ḍâri Lora Dewan Pengurus Cabang (DPC) Persatuan Wredatama Republik Indonesia (PWRI) Sumenep, Rusdiyono.
Salèrana saroju’ tor sanat kaangghuy nyombâng pamangghi nalèka DPKS bhuto bhântowan informasi (berta) ḍâri ca-kancana PWRI.
“Bilâ’â bhâi DPKS bhuto, bhâdhân kaulâ sadhâjâ sè bâdâ neng è PWRI sanat. Pola è buḍi arè DPKS bhuto data otabâ sakadhâr ghuna berta, insya Allah pagghun sanat,” ca’èpon.
“Ponapa ka’ḍinto kaangghuy kamajhuwânna pendidikan Sumenep, salagghi’ mampo tor sempat, tanto haram hokomma PWRI nola’ tor nyorot,” pongkas Rusdiyono.
***
