Maka ne’mat se kemma se patot epongkere! KobasaNa se kemma se bisa etero ban manossa, ja’ gan settong bai ne’mat se nongko’ neng e gigi, bila ecabut ban Se Kobasa, serrona dhu ma’ ngagarudhu’; cethak mara se ta’ egarassa edhuk-gadhukkagi ka geddhung!
Korona dhateng. Badan gedduran kabbi. Nyaba seksek. Kole’ kolot mara se ebanga’ neng e tomang. Ta’ se kemma’a manossa neng e sabara’ala manca–padha posang kabbi nyare bukona tamba.
Saka’dhinto, toro’ pole dhari cethak. Cethak dhalem basa ebu (Indonesia) ekoca’ “kepala”. Kepala otaba cethak aesse otek kennenganna indra se pa’-empa’: colo’, mata, kopeng, elong, sabariya keya indra se nomer lema’: kole’.
Bila pon cethak sake’, noro’ sake’ badan ka baba. Sapaneka jugan dhalem parkara organisasi; kepala, katowa otabaepon loraepon daddi tompowan sakabbinna se badha e baba’anna. Bila “kepala”-na rosak, sakone’ bannya’ baba’an noro’ rosak keya.
Rosak namong bunten ta’ battal. Salaggi’na ate se akelbu’ dhalem organisasi gapaneka bisa ejaga, ejaga sareng pasera’a bisaos se badha e dhalemma; ejaga dhari nyengga’na barang-barang se kotor, jit-jit, parkara otaba najis.
Ponapa se emaksod atena organisasi, enggi paneka tojjuwan; Kadiponapa organisasi gapaneka bakal ejunjung? Dha’ ka’dhimma organisasi gapaneka ejalannagi?
Saka’dhinto jugan manossa kalaban badan bang-sebangnga. Ratona badan enggi satompo’ daging se akelbu’ dhalem aba’na. Emot dha’ dhabuna ulama: Manabi bagus atena, bagus jugan guli enneng angguta badan bang-sebangnga
gambar ilustrasi: maca badanna manossa (lampu terang dalam dalam gelap)
Ngereng ebarattagi ate kalaban damar conglet. Ponapa bisaos essena damar conglet? Settong enggi kaca saropong, sombu, te’-pelte’ otaba ter-poter kennenganna makene’ ban maraja apoy, baddhana mennya’ tor essena.
Kaca saropong ebarat panca indra, sombu ebarat ate, apoy iman (kayakinan), te’-pelte’ du’a otaba shalawat tor istighfar. Se pongkasan enggi ka’dhinto amal otaba tengka gulina manossa dhalem re’-sa’arena.
Saka’dhinto, manabi amalla (mennya’na) bannya’ tor sokkla, sapaneka bakal gampang moji apoyya (iman/kayakinan).
Sokkla maksottepon mennya’ gapaneka ta’ kengeng asella aeng (riya’ otaba ‘ujub). Manabi amal se ekalako manossa gapaneka asella riya’ terro alem manossa laenna, ‘ujub ma’angga’ aba’na dibi’, yakte iman dhalem aba’na ta’ jamburungan bakal odhi’ mate; lep-kellebban!
Namong sanajjan bannya’ tor bagus amallepon, tape panca indrana lako egiba ka barang se makseyat, sapaneka bakal celleng kaca saropongnga; daddi lang-alang sonar se tera’ dhalem aba’na; burung se tera’a badan bisareng sakobengnga.
Saka’dhinto malar mandar artikel paneka daddiya tambana manfaat dha’ badan kaula dibi’, jugan dha’ para maos Dimadura.id sadajana. Amiin
MADURA.ID – Maca Badanna Manossa. Ju’-toju’ kadibi’an neng e amper, mekker kadaddiyan tong-settong bagiyanna badan.
