Pan-saponapan Nyamana Kennengngan se Kalonta e Kottha Songennep, Para’ Bannya’ Oreng Loppa!

DIMADURA.ID – Dullu, pan-saponapan nyamana kennengngan-kennengngan paneka ce’ kalontana monggu dha’ magarsare Songennep, Madura, Jaba Temor.

Monggu taretan se toron ka dunnya taon 1980-an, tanto enga’ dha’ kennengngan-kennengngan ka’dhinto.

Bakto terros apoter, jaman tamba maju, pan-saponapan bangonan se badha e Songennep bannya’ se aoba noro’ gilina jaman. Samangken ampon jaman milenial, ampon bannya’ oreng loppa ka badhana se dullu ce’ kalontana.

Sapaneka tanto, aobana nyamana kennengngan paneka sorop kalaban sajjana pamarentana.

Saka’dhinto, kantos pan-saponapan nyama e baba paneka noro’ tagerrus, para’ elang serna dhari engeddanna magarsare Songennep.

Lonnalon

Dullu, ra-kera taon 90-an, kennengngan se mangken anyama Taman Adipura otaba Taman Bunga ka’dhissa’ kappra kalonta kalaban nyama Lonnalon, atena Kottha Songennep (Pusat).

Enggadhiya, neng e Lonnalon, daddi pamoleyanna na’-kana’ ngangodhadan tor sabarundhut magarsare Songennep amaen, amalem mingguwan, abalanja, tor kadhang agalimpo’ sakanca’an arembak kaodhi’an se ba’ari’.

Pasar Cere’

Ta’ oneng aponapa ma’ pasar se badha e dhajana Taman Bunga ka’dhissa’, dullu, enyamae Pasar Cere’.

Paleng se emaksot banne Pasar Cere’ (pasar kotoran), bali’ Pasar Cerre’ (pasarnya orang pelit) kennengganna oreng Cena ajajuwal.

Monggu reng Songennep, oreng Cena kalonta cerre’. Kantos badha pantun e baba paneka:

Mandar badha’a Cena mate
Ekoro’a ban dusana
Mandar badha’a karena paste
Etoro’a ka bengkona

Pasar paneka dullu jugan kalonta kalaban sambidan Pasar Tujuh Belas otaba Pasar 17 Agustus.

Aponapa ma’ enyamae Pasar 17, badan kaula jugan korang oneng saongguna. Paleng polana neng e gadhiya dullu daddi kennengngan men-rammenna oreng ngonjuk kamardikaan Indonesia, 17 Agustus 1945.

Langkong jarna’, sae para maos ngoddi tanya’agi dha’ para bangaseppo, salaggi’ badha omor. Ja’ kalep terros esse’e Kolom Komentar neng e pongkasannepon tolesan paneka.

E baba paneka jugan maso’ dhalem daftar nyamana kennengngan se ampon para’ elang dhari paradaban Songennep. Namong ta’ sae manabi dhan kaula terrangngagi sadajana neng e serradan paneka. Tako’ lanjang gallu’, kantos para maos pas momos se matotoga kantos pongkas.

3. Paajaman: Jalan Manikam, Bangselok

4. Pajikaran: Bangselok, Kolor tor Pandian

5. Jam-ajaman: Partellon neng e Pamolakan se badha patungnga ajamma

6. Ḍâ’ḍul: Dullu, samangken Lapangan Tembak, Pamolokan

7. Moncol: Kennengngan e bara’na labang maso’ ka Pasar Anom

8. Sarpao: Partellon e bara’na BLK, Parsanga

9. Sarkaju: Partellon neng e Pabian, dullu jalan tembus ka Sar Pao

10. Sarkobhurân otaba Sarsorè: Pasar penggir jalan dhari budhina Pondhuk Al-Azhar kantos parempatan dhajana Settopan

11. Settopan: Parempatan Kottha Songennep

12. Masèghit Laju: Langgar kene’ teppa’ e dhajana Rumah Dinas Bupati Songennep

13. Pajinggâ’ân: Jalan Mutiara – Jalan Zainal Arifin

14. Panganḍungan Dhukar: E lao’na kantor DPRD

15. DKA: Pos Polisi e lao’na Lonnalon Kottha Songennep kantos e adha’na Bakso Prima

16. Stamplat: E dhajana DKA

17. Pèlar Bârâ’: Parempatan neng e Pandian, temorra Galadhak Banagung

18. Pèlar Ḍâjâ: Partellon neng e Jalan Halim Perdana Kusuma (Jl. Haperkus), Kepanjin

19. Bâ’ Anḍing: Dhaja jalan ka bara’ RSUD dr Moh Anwar, lao’ jalanna anyama Kotthe

20. Kotthè: Lao’ jalan ka bara’ RSUD dr Moh Anwar kantos Masjidda Ke Mukmin

21. Taman Lakè’: Pamandhiyan se badha neng e PDAM

22. Apotek Laju: E lao’na Kantor PDAM

23. Dhâk Tello: E Kampong Arab, badha galadhak tatello’

24. Karang Rabâ: E Pajagalan

25. Lotèng: Pondhuk neng e Sar Sore

26. Lao’ soksok: E Pandian

27. Labângan: Jalan Kemala, Bangselok bagiyan bara’

28. Lèngker Patè’: Labang maso’ ka Pasar Anom, Kolor

29. Anèm: Ebaca Anim, Parempatan neng e PLN

30. Pongbâru: Parapadan BRI Unit Kota Sumenep

31. Pongarab: Bara’ jalan temor jalan, hari Parempatan Pong Baru ka lao’ kantos TPA Sampah Perlimaan Pajagalan

32. Kampong Pajingan ban Pajikaran: Bangselok, Kolor, Pandian

33. Kampong Pacènan: e budhina Toko Surabaya, badha keya e Kacamadan Tang-Batang

34. Toghur Nosi: Teppa’ neng e Lapangan Terbang Bandara Trunojoyo

35. Nèngnèngan: Jalan Saluran Air, SMPN 6 Pamolokan

36. Karang Sabu: Dullu Gedung Bioskop Laju, e Jalan Diponegoro

37. Tangsi: Asrama TNI, Jl. Haperkus Pasar Sore

38. Karang Radhinan: Kampong neng e Pandian

39. Toros Lao’: E lao’na Galadhak Banagung

40. Saghârân: E temorra Gor Damala, Pajagalan

41. Dhâmala: Kawasan Jalan Dr. Wahidin e Pajagalan

42. Tèmor Tangsè: Jalan Ksatrian, Pajagalan

43. Jhâghâ Tèmbâ: Jl. Letnan Ramli, gang otaba embong nojju dha’ Barung Lena, Kepanjin

44. Lisun: Partellon e temorra Kantor Koramil otaba Rumah Sakit Islam (RSI) Kalianget

45. Settusin: Esebbut jugan Yek Tusin otaba Syeikh Tusin, Partellon e temorra dalemma Ketua PGRI Sumenep, Pak Haji Nono

46. Mastasè’: Jalan Raung, Pabian

47. Ghâlâḍhâk Rantai: Partellon Marengan ka Girpapas

48. Panglèghur: Lapangan sepak bola, Stadion Ahmas Yani, Sumenep

49. Pello’: E dhajana Taman Makam Pahlawan, e seddi’na Pasar Mano’, Karangduwak

50. Tèrkop: Teko’an (tikungan) e seddi’na dr Bambang, Pangarangan

51. Ghumo’: Asta otaba pasareyannepon K. Ali Brambang, e temorra Lapangan Terbang Trunojoyo

52. Sakola’an TD: Jalan Taman Siswa, Karangrawa, Bangselok

53. Sakola’an Marikan: Dullu SDN Pangarangan 1, samangken daddi kampong

54. SMP Lokasi: Dullu, sabellunna daddi SMPN 1 Kalianget

55. SMP Ma’arif: Samangken daddi SMA NU, e lao’na Masegit (Masjid Jamik)

56. Somor Kojhur: Pompa Air e PT Garam, e bara’na SMPN 1 Kalianget

57. Kantoran: Partellon e temorra PT Garam, Kalianget

58. Kampong Sènter: Atandha tandhunna aeng neng e Lon-alon Kaleanget

59. Kamar Bola: Dullu kolam rennang andhi’na PT Garam Kalianget

60. Samirin: Partellon e temorra Gedung Rakyat, Kalianget

61. Pasar Laju: Samirin ka dhaja

62. Pasar Pabrik: Samangken anyama Pasar Sattowan, Kalianget

63. Pangarèsan: Kantor Kacamadan Kalianget

64. Ko Pè in: Jl. Blimbing – Jl. Diponegoro Karangduwak

65. Bhuju’ Tamonè: Atandha ka’-bungka’an raja, bungkana accem e Jalan Raya Batuan

66. Pasar 17 Agustus: Pasar e dhajana Taman Bunga ban e Bangkal

67. Giling: Lapangan Kerraban Sape se badha neng e nga’-tengnga’an antara Disa Pangarangan, Pamolokan ban Bangkal

68. Terminal Laju: Samangken daddi Taman Tajamara

Gapaneka sabatara pangaonengan badan kaula se etokel dhari pan-saponapan sumber referensi. Manabi para maos andhi’ otaba enga’ dha’ kennengngan macem kasebbut, eyatore toles neng e Kolom Komentar e baba ka’dhinto.

Kaso’on, neng e artikel saterrossepon badan kaula badhi ajarba’agiya tong-settong nyamana kennengngan kasebbut e attas.***