Caretana Rusydiyono
DHU BULAN se tapongkor, pekkeranna Eppa' ban Emma' sempat ta' akor. Namenna bako apa enja': ngabas gulina angen, coaca ban argana, katon la ta' kera padha ban taon sabellunna.
Eppa' ta' marduli. Saba se badha kodu tamenne. Sabab reng lake' andhi' kawajiban makane ana' ban bine. Soal arga ban coaca, sadajana Guste Allah se Ngobasane.
E baja laggu, Eppa' makalowar sape ban nanggalana. Nyambi landhu', marata tana se daddi lama'na duwa ban pangarep rajekke Pangeranna.
Emma' se asalla mangmang, paggun maso' ka tomang kaangguy ngonjukkagi pangabekte. Ngerem lake se ananggala ngangguy sape. Sanajan ta' olle pesse, paleng enja', ta' kalero e Ajunan Guste sabab enteng ka lakona lake.
Saellana bako la towa, ngarep dagang se melleya, Eppa' akaton rengsa. Bariya keya Emma'.
Dagang se biasa akalemba' sateya tadha'. Saba se biasana ramme ben oreng bar-tabaran, sateya seppe ta' kala ka koburan.
Eppa' lakar settong, sakeng oreng tane se rengsa ban sossa reya arontong.
Emma' se mangmang namen bako pajat keya coma settong, tape reng bine' se atanya asella namen bako ka lakena, masena, lebbi sakampong.
