Careta Pandha': Mazdon
Mangka Sahramo gun ngoca' bariya ka binena. “Enja', Le', ba'na elongnga enja' ta' pese', gun nyellet sakone'.”
Neyadda agaja'a, polana binena atanya, “Mak! Ca'na emma', engko' sajan lempo, elong atamba pese' ya, Mak?”
Mon polana, Sahramo pajat majarna' jawabanna. Pekkerra Sahramo, olle binena ta' koceba dha' kabadha'anna aba'na.
"Nyellet reya banne terkep, Le'. Nyellet ban terkep bida oca', bida panggibat. Pendha nyellet, 'etembang pas terkep! Asokkor ra.. pabannya'," oca'na.
Sahramo ngejjit. Aba'na seyal. Ta' aromasa. Temmo-temmo, Sundhiya binena, nabbu sobluk ban langka'na. Pereng e anjangan esothok, epanompa.
Karonnyang. Gurimprang. Jablus!
Essena dhapor car-kolacer. Se nyamana nase' ban juko' atabuyan e babator. Kelmo' se buru possa' eyesse'e aeng, ngasowar alembek ka lobangnga tomang dhaporra.
Asar maba. Ana'na se dhadhuwa', lake'-bine', padha buru mare mandhi. Asanat se mangkada ka madrasah. Ma' dhari dhapor, Sundhiya buru ka taneyan. Agulur. Aleyer. Atharat ngonjang tatangga.
"Aponapa, Pa', Ebu ma' molar kose kadi gapaneka?" Budin atanya ka eppa'na.
Ta' sempat Sahramo nyaot. Sundhiya aorak. "Senga', Cong... Bing... Senga', ba'na ja' pangala' ka mama'na jareya, ya. Mama'na jareya ta' tao ka perasa'anna reng bine'. Paleng lamba' tamonena ta' ebacco," ca'na.
“Mon ba'na so ale'na, Cong.. enja', berse nyaena ban kaena se maccowen tamonena. Eyopenen. Epakose ngennyer, benneng se nyamana aeng. Ta' lekko mara babategga mama'na jareya!”
Terros. Ta' ambu Sundhiya se ngacepek. Tatangga adhatengngan. Taneyan lanjang romana possa' towa ngodha. "Ambu, Ma'. Todhus ka oreng," nyaot se cebbing.
“Enja'. Sampe' bila'a bai sengko' ta' kera ambu. Mama'na jareya soro ondur ja' neng e dhiya! Jareya ta' esto pole la ka emma'na reya, Bing. Korang ajar! Ta' eburuk paleng ban mama'na. Pantes ja' ta' taowa ka bajaraga. Ta' tammat sakola'anna. Ta' totok paleng ngajina. Korang ajar!”
Sahramo thel-senthelan. Manyaman ngompa' nase' ban juko'na e amperra. "Gila. Gila jareya, Cong.. Bing. Dina jalan se mangkada ka madrasah," Sahramo nyaot. Ta' ngejabin binena se aguser e taneyan.
“Abas, Cong.. Bing... Tela' jareya ba'na mama'na! Sela tao binena enga' reya, manyaman, Cong.. Bing.. abadhuk paggun colo'na. Nyengnger. Padhana badha se ngalem. Huuuuu.. huwa huwa.. dodododo huuuu.. huwa huwa!”
Sundhiya sajan daddi. Paggun. Ta' edhep ja' bannya' tatangga nyapot. Paggun akowang. Atharat ngabbiyagi. Kose malenter se nyamana ora' e le'erra.
On-laon, ana'na se kadhuwa maso' ka pangkengnga bang-sebang. Tatangga iya keya, ondur gan tong-settong.
Sakejja' aggi' se kadhuwa, Budin ban Giya ale'na, asallem ka Sahramo. Amet mangkada ka madrasah. Sajjana terrosa ka taneyan. Neyat asallema keya ka emma'na. Sakeng araja'an tako'na, saengga nyese lebat penggirra babator. Aerset laonan, terros pas mangkat.
Sundhiya nangale. “Dhu.. Iya, Cong.. Bing.. Ngala' onggu ba'na ka mama'na. Nyese. Dhu.. mangkat. Ta' amet balakka' ka sengko'. Ereken sapa reya se molae gella' agulur e dhiya. Laju tadha' se neserra ka sengko' ko.. huuuu huwa huwa.”
Sasergunan. Sundhiya nyorkep. Temmo pas ongga ka amper. Mapeyar ka Sahramo. Lakena. Sakaleyan. Terros ma' temmo maso' ka pangkengnga.
"Tega ba'na, Mak! Tega onggu ba'na, Mak!" Lere oca'na ekaedhing dhari pangkengnga se ekanceng dhari dhalem.
***
Kalagguwanna, gi' ta' asobbu, ra'-tera' tana, Sundhiya ban Sahramo, abareng kalowar dhari dhalem jeddhing. Obu'na se kadhuwa padha bacca. Paleng mare adus.
Sumenep, 27 Agustus 2026
NB: Cerita Pendek Bahasa Madura atau carpan di atas ditulis menggunakan ejaan hasil Sarasehan tahun 1973. Sejumlah postingan karya berbahasa Madura yang tayang di media ini juga ada yang ditulis menggunakan EYD hasil Konsinyasi Balai Bahasa Jawa Timur yang diresmikan tahun 2012.
