Rora Bhâsa

Aré taséllem
Bulân nyandher nyarenḍem
Sonar épon ngaséyap melka alas
Mapaḍḍhâng ora’na ranca’ é sessel ḍâun

2
Na’-kana’ ghâpanéka terros nyalosop
Ka ḍâlem nab-anabhân. Atolé kangan bân ka kacér
Ré-saréyan bâḍâna kabhâr, ponapa sabâb dhâddhi toppal
Sabâgiyân ḍâri abâ’na ḍulumanna

Toron ongghâ ḍâri lembâ ka ghunong
Torkaḍhâng maso’ ka ḍâlem ghuwâ patapa’an
Kalowarra, ajhâjhâk alam saloka; nalékték
Oca’ sé samasténa:

Élang bânné élang
Nyélona dhâddhi okara
Tasangsang dhâddhi parkara

3
Ḍâ’ bârâ’ ka téngghina
Kétabbhâ épékol neng bhâuna
Ampon berrà’ pajhâlânna
Ka jhurâng ngantol sanḍâllâ édhina

Sa’ellana ḍâpa’ ka astana
Rora bhâsa sé saongghuna
bâkto lagghi’ bâḍâ sowarghâna
juju’na aḍhâbu sapanéka:

Cong! Coma sakeccap ḍâlem oca’
Ca’na bâ’na taḍâ’ arténa, namong sé saongghuna
Sabbhân oca’ réya pasté ngonḍhu du’ana. Dhàddhi, séngko’
Matoro’a kembhâng bighina dhunnya
Paghi’, coma ḍâ’ bâ’na!

Sapanèka caréta ḍâri sorat angghidhânna
sé éjhumbu’ ḍâri ḍâlem lomarina.

Penulis: Mazdon