"JA' AGAGAJADAN. Ja' ne-banneyan. Sengko' ta' lebur alagiyan parkara apa bai. Apa pole semo. Mon maksa, bila kare meddem, sengko' ta' tao ka sapa. Ko jindral, ko kyae sakale, mon la tengkana ta' bendher, paggun epasepplak!"
Supat apeggellan. Pasalla, Narito amaen roce. Kartu palak lema' tadha' neggu'. Esaloksak. Kabbi se kaempa soro manjeng. Ropana, ngakalotthak gaggar dhari dhalem sarongnga Narito.
Ma' Su'din ngakak. Karwan sem-mesem balibis. Banne olle macellep ka Supat. Mowana atamba mendhar. Ngaronyam. Ngakarommong. Nyacam ka man-dhimman, pojur ta' sampe' mokol.
PASALLA, molae marena Isya' kantos pokol dhu bellas malem, aba'na ta' bu-ambu se jaga robbu. Amaen dhum. Tengkongan.
"Op lah. Ambuwa. Roce kabbi reya e dhiya. Ta' suceng en-maenan."
Mare ngoca' ngan jareya, ta' toju' pole, Supat abaludhus toron dhari gardhu. Ngala' sandhal, terros ngendhing ka jaraja. Mole!
Entas nyabbrang alengka lorong, Supat aduding ka gardhu sambi memeso. "Ja' arep sengko' nengga' ka jadhiya pole. Ba'na, To! Ambu ja' lok-ologan ngajak sengko'. Ta' amaena ban kong-jarangkong. Ta' dhapor kabbi. Congocowan!"
JI RONI se andhi' barung, se majaga gardhu kennengngan lalanggananna nongkrong, manglo ka Narito ban se laen.
"Ba'na onggu, To... Din... Wan... Palebur mon amaen. Neser ka Supat. Arowa ka dhiya sabban malem, mon polana banne keng terro le-melleya, aba'na guna lebur maramme. Sajjana olle tang barung reya ta' seppe," mamanglona.
"Mon la mara reya, kan pas ta' lebur ka budhina. Ja' ulange, manna ta' akor sakanca'an," embuna, nga'-masenga' ka se katello.
"Ta' kera ja', Ji! Jareya Supat gun kanthana, polana pendhet nengkong malolo bari' mola". Narito nyaot nyambit panglowanna Ji Roni.
"Ta' osa soro, lagguna la nyaman pole oreng jareya. Ja' la Supat, lamba' jareya lah. Tadha' caretana peggel saabidda. Sengko' kennal Supat la lamba', orengnga ta' lebur norae," oca'na, nambain jarna' banta sabellunna.
***
TA' OLLE dhu mennet, Supat temmo mo'dul dhari jalan tapak dhangdhang, dhajana Pos Kamling.
Sajan semma', terros ngendhing sajan semma', Supat temmo aessut tonju' ka bibirra. "Ssssssst... Ja' nger-enger. Kala' sekep ban senterra. Badha kalemba'na oreng buru e budhina kandhangnga Su'din," oca'na, lere atotoran.
Banne esep. Ji Roni, Narito, Su'din, ban Karwan mala ngakak jung santa'an. "Baramma, Ji! Apa ca'na engko' gella'? Jareya' Supat!"
Narito mabali caca. "Ongguwan ba'na, Pat? Senga' mon co-ngoco," oca'na, partaja semmo ta' partaja ka kabar se epadhapa' Supat.
"Sssssst... Laju pas kala' ba'na bussrina, kerressa, apa'a bai sekep se esambi," teggessa. Paggun. Ropana mon sateya Supat ongguwan. Badha maleng!
"Ba'na, To! Karwan ban sengko', mayu' amba' e mor lao'. Dina Supat so Su'din ma' nyeser nyendhemme ka seddi'na kandhangnga.
***
Jhi Roni, Narito, ban Sukarwan mangkat ka MAKAM PANYERGU'; makam e baba'anna raja bungkana pelle mor lao', makam se ca'na bangaseppona Narito, mon badha maleng maso' ka disana, ta' burung bakal nyambi barang keco'anna, lebat e makam jareya.
Dhapa'. Kabadha'an abak seppe. Gun lanto sowarana mano' kowek, jangkrek, ban jerring e teggal jutemorra. Angen ngalesser. Asapo' rembessa ebbun, se katello nyorkep ka tabun e seddi'na Makam Panyergu'. Sambi asanat, tako'-tako' malengnga temmo lebat.
Dhari jaraja, Su'din nenteng kopengnga Supat. "Ya', Ji.. To.. Wan.. Ya' malengnga. Ekenneng sela!"
Mangka abak santa' Su'din naja' konco' kopeng attassa. Supat nyengnger asapora ka se katello. "Ellek la. Impas, ya!" Oca'na.
***
