Leburra Abuka Powasa ban Ca-kanca Jurnalis Bintang Sembilan

SUMENEP – Lekoran wartawan se agalimpo’ neng e organisasi Jurnalis Bintang Sembilan (JB9) akompol, abuka areng-bareng e Kantor Jaringan Media Media Siber Indonesia (JMSI) Kabupaten Songennep, Madura, Satto tanggal 14 Maret 2026.

Papanggiyan se kappra elaksana’agi sabban taon sakaleyan reya kalampan kalaban dha’aran ban enoman sabadhana.

“Kennyang ate, kennyang tabu’ apa bidana?” ca’na Katowa Jurtoles Bintang Sanga’ (JB9), Ahmad Rahman, mokka’ kandha.

Ahmad Rahman, se mangken jugan epartaja nyeppowe Baznas Kabupaten Songennep, terros madhapa’ pan-barampan pessen dha’ ca-kanca sopaja’a ta’ loppa ka asalla.

“Sengko’ ban ca-kanca kabbi se hadir reya kalowar dhari rahimma NU, rahim para ulama, yaktena kodu padha ajaga dha’ kabadha’an,” pessenna.

“Afdlalul ilmi ilmu al-hal, wa afdlalul amali hifdzu al-hal. Sabagus-bagussa elmo iya areya elmo kabadha’an, sabagus-bagussa amal iya padha, ajaga kabadha’an,” teggessa, nambain genna’ katerrangan sabellunna.

Baca Juga:

RSUD Sumenep Hadirkan Layanan Antar Obat Langsung ke Rumah

Jangkep pessenna Rahman epaterros ban bangaseppo Jurtoles Bintang Sanga’ laenna, Ahmad Ainol Horri, se kalerressan mangken toju’ epartaja daddi sala settong komisioner Komisi Informasi (KI) Kabupaten Songennep.

“Sateya baktona akompol, baktona nginstal ulang pekkeran, kana’! Teppa’ se ca’na Rahman, mayu’ ka budhi dhari sateya padha ganteng saleng paenga’. Polana tekka’ wartawan ca’na reng-oreng reya molja kalaban tolesanna, sakone’ bannya’ kadhang tabaliccer,” totorra, nyambung kandha.

“Daddi paleng enja’, mayu’ ca-kanca se badha e dhiya reya, bisa ajaga ban nyareng baramma koduna noles kabadha’an. Polana baramma’a bai, berita reya berrit. Noles nyalethong sakone’, bakal nyalethong keya kabadha’an,” embu Ahmad Ainol Horri.

Tontas acara, ca-kanca abajang aganteyan, polana kennengngan korang notot kaangguy ajamaah areng-bareng. Para’ Isya’, kandha etotop kalaban shalawat.

***