SUMENEP, DIMADURA – Madura Batik Fest 2026, gabayya Pamarenta Kabupaten Songennep, kalaban bul-ombul "Batik Madura Bangkit: Merawat Warisan, Menguatkan Identitas Bangsa", rasme pon ekanthang. Acara epaddek neng e Mandhapa Agung Karaton Songennep, Rebbu (20/5/2026).
Lampa ka'dhinto aropa'agi bagiyan dhari balangajana pamarenta kaangguy aromat budhaja Madura, jugan kaangguy maodhi' taresna tor pangestona ngangodhadan nyoppre langgengnga bathek Madura.
Festival nyamana, elaksana'agi kalaban workshop tor lateyan ngangodhadan ajar abathek, bathek khas Songennep, Madura.
Dhalem hal ka'dhinto, Pemkab Songennep ngajak kanthe' ngangodhadan galimpo' Ikatan Pelajar Nahdlatul Ulama bisareng Ikatan Pelajar Putri Nahdlatul Ulama. Tojjuwanna, sopaja para ngangodhadan bisa ganteng saleng paenga' kaangguy ta' busen aromat kabudhajan barisanna bangaseppo.
Salaenna workshop tor pelatihan, panitia jugan andhi' neyat kaangguy mabadha acara Expo, otaba Pameran Bathek e dhalemanna sabulan se bakal dhateng. Tojjuwanna, sopaja bisa makapencot pangaterrona oreng lowar dha' bathek Madura.
Staf Ahli Bidang Pamarenta'an Kabupaten Songennep, Hizbul Wathan, se hadir abakkele Bupati Songennep, ngalem sadaja pihak tor sponsor se ampon noro' abanto lampa ka'dhinto.
Menorot pamanggina, sopaja bathek Madura bisa kaonang tor agiba bannya' manfaat, kodu badha sajja kaangguy terros aromat budhaja tor tareka se bisa abuthok tombuna ekonomi magarsare Songennep.
"Oleh karena itu, kami mengajak para pemuda untuk ikut mengembangkan batik. Pemkab Sumenep sendiri terus mendukung pengembangan batik, salah satunya dengan menjadikan batik sebagai seragam pejabat setiap hari Jumat," ca'epon Wathan, ngangguy basa Indonesia.
Hizbul Wathan jugan ngajak sadaja magarsare Songennep sopaja terros ajaga tor aromat kabudhajan se badha, nyoppre kabudhajan bathek Madura sajan kappra tor langgeng ta' eyanyo' aros jaman.
"Selain batik, melalui keputusannya, Bupati juga telah memasukkan keris sebagai bagian dari upaya pelestarian budaya daerah," totorra.
