TAREKA DIMADURAID – Pidato otaba ceramah ka’dhinto toman epadhapa’ sareng Habib Rifky Alaydrus dhalem settong kasempadan kalaban ngagem oca’ basa Indonesia. Ka’dhinto redaksi serrat kalaban basa Madura nyoppre daddi pangajaran monggu paramaos dimadura.
Pidato Habib Rifky Alaydrus dhalem basa Indonesia ka’dhissa’ ampon ongga neng e channel youtube Pangajian Umum, 29 Oktober 2022 se tapongkor.
E baba ka’dhinto teks terjemahan se epetthek tor esalen basa dhari ceramah-epon Habib Rifky Alaydrus. Ngereng same kagali areng-sareng.
Abakte dha’ Reng Seppo Dhuwa’
Banne polana aebada ebuwan rokaat. Banne polana apal Alquran, banne! Bali’ polana oreng gapaneka abakte dha’ ka oreng seppona.
La ilaha illallah. Sokkor badan kaula gi’ andhi’ oreng towa, oreng towa gi’ badha e adha’an. Rabat, ladine kalaban onggu-onggu kadhuwa kalaban ate se ekhlas.
Ne’mat se ce’ agungnga paneka naleka oreng towa duwa’ laggi’ badha e adha’anna dhuwa’ mata dan kaula sadaja.
Nyeom astana ulama, astana kyae, astana umaro, hokomma ta’ penting tor ta’ wajib, ganeka coma noro’ sunnah-epon Kanjeng Nabbi. Bali’ candhak seyom astana ebu sareng eppa’na, Allah bakal ngangka’ darajadda ana’ kalaban kadar kadiponapa baktena ana’ gapaneka dha’ reng seppo dhuwa’na.
Tadha’ na’-kana’ sukses, ontong tor bajjra se ta’ lebat du’a otaba pangestona reng seppo sabab pangabaktena ana’ gapaneka. Kadiponapa kadar pangabakte ana’ gapaneka abakte dha’ reng seppona, gan gadhiya bates kabajjra’an ban kasuksesanna.
Ajja’ sampe’ magili aengtamana oreng seppo, ajja’ sampe’. Manabi sampe’ kadaddiyan ban ta’ erida’i sareng reng seppo, maka haram hokomma na’-kana’ jareya maso’ ka sowargana Allah.
Ja’ aen-maenan! Orengtowa bendher ta’ nanges, ta’ molar e adha’na ana’na, tape mon sampe’ salerana molar dha’ ka Allah, pasanat aba’na bakal olle bala tor balai dhari Allah SWT.
Petanyana Sahabat dha’ Rasulullah ngengenge Pangabaktena dha’ Rengseppo
Sahabat nabi ngadep tor mator dha’ Rasulallah, “Ya, Rasulallah.. Ba’ pon abakteya badan kaula dha’ reng seppo? Ampon sadajana pon eyatorragi ka reng seppo. Badan kaula ngeba rengseppo dhari Mekka ka Yaman, dhari Yaman ka Mekka kantos abali pole ka Yaman, ta’ toman toron terros egandhung sareng abdina,” ca’epon.
Ponapa jawabba Nabi? Wallahi, apa se ekalako ba’na jareya gi’ ta’ dhugga kaangguy abales settong kelbu’na nyaba se ba’na kaolle, polana badhana salerana ba’na laher ka dunnya!
Te-ngate enggi, tadha’ na’-kana’ se bagus kaodhi’anna ta’ kalaban lebat du’ana dhuwa’ reng seppona.
Ngereng areng-sareng maos du’a kaangguy reng seppo dhuwa’: rabbighfirly wa liwa lidayya, warhamhuma kama rabbayani, shaghira!
Ce’ gampangnga maos du’a paneka, namong kalaban du’a gapaneka, Allah bakal apareng kaberkadan dha’ ka na’-kana’ gapaneka.
Daraka dha’ Rengtowa
Samangken bannya’ na’-kana’ daraka dha’ reng seppona, corne’ neng e Pesbuk, kantos badha se ngoca’, aba’na koceba elaherragi dhari eppa’ ban emma’ se mesken. Ta’ bisa ebajangngagi kadiponapa la’nadda Allah dha’ kana’ gapaneka.
Ale’-ale’, ngereng onjuk pangestona, parabak taresnana, paongga rengseppona kantos bisa nongko’ neng e attas bun-embunanna ba’na kabbi.
Manabi bisa, molar kaangguy reng seppo dhuwa’, so’onnagi kabunga’anna, kajembaranna, kagumbira’anna, kantos ngaolle rahmat-epon Allah amarga ngormat tor abakte dha’ reng seppo dhuwa’.
Ampon saka’dhinto babulangannepon Habib Rifky Alaydrus ngengenge pangbaktena ana’ dha’ reng seppo dhuwa’na. Wallahu a’lam bisshawaab! Mator sakalangkong. ***
Sumber: Youtube Pengajian Umum
