Tarèka, DIMADURA–Aeng nyeor pajat ce’ nyamanna mon ekagabay sellana enoman bakto buka powasa. Tape taowa ba’na ja’ aeng nyeor reya ropana ta’ gun masegger ka badan, bali’ keya bisa mabaras?
Nokel dhari Kompas.com, Ahad (8/4), ahli diet Maxine Smith adhabu ja’ aeng nyeor ropana agandhu’ elektrolit kadiya potasium, natrium tor magnesium.
Elektrolit otaba macemma cairan jareya bisa abanto badan polana bisa mabali nutrisi tor energi se la elang.
Daddi aeng nyeor sanyatana ce’ bagussa mon eyenom marena ngolaraga (olahraga), reng sake’ se ta’ para, otaba pareppa’na buka powasa’an polana la ta’ ngakan ngenom saareyan.
Gunana Ngenom Aeng Nyeor
Ngenom aeng nyeor ropana bagiyan dhari diet se bagus polana bisa abanto mabali hidrasina badan.
Adhasar panalekteganna oreng banya’, aeng nyeor ca’na rendha kalori, bibas lemma’ tor kolesterol. Mangkana aman kaangguy ekonsumsi.
Ngonsumsi aeng nyeor bisa madhateng pan-barampan manfaat padhana se bakal kasebbut e baba reya:
1. Nyegga bato ginjal
Se ekoca’ bato ginjal iya areya atompo’na zat kapor ban zat laen padhana kalium, klorida, ban sitrat neng e bu-rabuwan (urin) kantos gali mara bato.
Maxine Smith adhabu, hidrasina badan daddi bungkel bisa enja’na badan kacegga dhari bato ginjal.
Laa.. e jadhiya gunana aengnga nyeor. Aengnga nyeor bisa malegga ban aberse’en sistemma badan.
Asella panelektegan taon 2018 noduwagi ja’ aeng nyeor bisa nyothok badan kaangguy maancor zat kapor; mowang kalium, klorida ban sitrat dhalem bu-rabuwan.
2. Mabagus kole’
Riset taon 2017 daddi bukte ja’ aeng nyeor agindhu’ sepat antimikroba se bisa nyegga tombuna jaraba’.
Salaenna jareya, ngonsumsi aeng nyeor bisa abanto sistem antioksidan kaangguy manetral badhana efek radikal bebas.
Leppas dhari efek radikal bebas tanto bagus kaangguy kole’na manossa; bisa paggun ternya’ ta’ korang ban nutrisi.
3. Maembang kadar gula dhara
Aeng nyeor agindhu’ magnesium abak tenggi. Kandhungan magnesium jareya bisa abanto matombu sensitivitas insulin sarta matoron kadarra gula dhara monggu oreng diabetes.
Ta’ gun magnesium, aengnga nyeor jugan agindhu’ mangan, vitamin C ban L-Arginine se bisa majaga sensitivitas sel sopaja bisa nyojju insulin.
Empa’ nutrisi kasebbut ce’ teppa’na kaangguy maembang badha gula dhara dhalem badanna manossa.
4. Bagus ka jantong
Studi taon 2005 noduwagi settong kasomaktaan ja’ aengnga nyeor aguna kaangguy matoron tensina dhara se agili nene e badan.
Oreng se andhi’ panyake’ dhara tenggi sae ngonsumsi aengnga nyeor se gi’ ngodha. Sabaligga, oreng se andhi’ tekkanan dhara rendha, olle tape ta’ ngenneng nya’-bannya’.
Gagindhu’ dhalem aengnga nyeor se bisa matoron tensina dhra dhalem badan anyama zat potasium.
Salaen bisa matoron tensi dhara, potasium jugan kabukte bisa maelang natrium ekstra dhari dhalem badan lebat bu-rabuwanna kamalowan (urin).
Kadar natrium se tenggi bisa aganggu dha’ kasomaktaan jalanna cairan dhalem badan; diameter jalanna dhara sajan sempet.
Kabadhaan jareya se nyababbagi jantongnga manossa kodu abalangaja ngompa dhara ka sakojur badanna manossa.
Mon la ta’ kenneng balangajai, ya ta’ jamburungan jantong mate, neng-ngenneng ta’ ngenneng alako. Kabadhaan mara reya se andaddiyagi kadhang manossa ngebblak mate dadagan.
Melana, DIMADURA rassa parlo maongga artikel paneka sopaja taretan Madura tao apaan gunana aeng nyeor kaangguy badanna manossa. ***
Artikel ka’dhinto esalen basa dhari Kompas.com: Tak Hanya Menyegarkan, Ini 4 Manfaat Minum Air Kelapa
