Angghidhân: Utsman Abdhi Dhâlem
KOSAKATA, DIMADURA – È ḍalem kabâḍâ’ân rè-sa’arè, bhâdhân kaulâ sareng panjhennengngan, segghut aghuna’aghi oca’ mèmpè, akadhi:
  1. Malemma bulâ amèmpè dhika, akaton dhika ghâḍhuwân kalambhi cè’ lèburrâ.
  2. Bângli ta’ tao jhâ’ ella ngèḍḍhâ, apa polè pas amèmpè ajhâlan bi’ eppa’na: pangrasana èntar ka sakola’an. (Sombher: Kètab Bâca'an Ghuru ka Morèd)
  3. Saellana ollè pèttong malem, è nalèka sèttong malem teppa’ tangghâl pa’ bhellâs, salèrana Pottrè Konèng tareddhep lajhu asopenna … (Babad Songennep)
Maos Jhughân:  Oca’ “mèmpè” bisa èyartè’è kalabân kabâḍâ’ân sè èkarassa è nalèkana asarèn (tèḍung) otabâ bisa jhughân èyartè’è kèyasan: ngen-angen sè èkakarep. Manabi ètalèktèghi, oca’ mèmpè asallèpon ḍâri bhâsa Proto Malaju-Polinesia, èngghi ka'ḍinto “hipi”. Oca’ asal panèka kèngèng sessellan -in- dhâddhi “hinipi”. Ḍâri oca’ asal panèka aobâ amacem bârna dhâddhi ḍâsar oca’ “mèmpè” sè kaonang bâḍâ tor eyaghem maghârsarè Nusantara, akadhi:
  1. Nipi: Bhâsa Bugis
  2. Nipi: Bhâsa Bata’
  3. Ngimpi: Bhâsa Jhâbâ
  4. Mimpi: Bhâsa Malaju
  5. Mèmpè: Bhâsa Madhurâ
Maos Jhughân: Salaèn ghânèka, bâḍâ jhughân oca’ “Sopenna” sè artè’èpon jhughân mèmpè. Conto ḍâlem okara: Pa' Abdu asarèn cè' nyeḍḍhâna, masè salèrana pareppa'na asopenna cè' saèna. Oca' Sopenna asallèpon ḍâri bhâsa Sangsekerta, “svapna” (èmaos: swapna), èguna’aghi ḍâlem bhâsa neng Nusantara, dhâddhi:
  1. Swapna: Bhâsâ Jhâbâ Kona
  2. Nyupena: Bhâsa Jhâbâ (Kromo)
  3. Sopenna: Bhâsa Madhurâ (alos-tèngghi/èngghi-bhunten)
Maos Jhughân:  Ḍâri conto è attas, bisa èkaghâli manabi bhâsa sè bâḍâ è Nusantara bânnya’ sè mèbis, amarghâ ḍhâsar bhâsana bânnya’ sè samè, akadhi oca’ sè ampon kasebbhut è attas. Oca’ “mèmpè” è ḍâlem bhâsa Madhurâ tamaso’ oca’ sè aonḍhâk. Onḍhâk anḍhâp (bâbâ) sareng tengnga’an (bhâsa enjâ-iyâ sareng engghi-enten) aghuna’aghi oca’ “mèmpè”. Onḍhâk tèngghi otabâ bhâsa èngghi-bhunten, aghuna’aghi oca’ sopenna.***
NB: Mangghu’ ḍâri cem-macemma agghidhân