Ghenna’ Contona Okara Kakanthèn Bhâsa Madhurâ: Ghuru Sowara, Sastra, tor Lumaksito

Pangkèng Sastra, DIMADURA – Ghâncaran pangaonèngan è bâbâ panèka aropa’aghi pan-saponapan contona Okara Kakanthèn sè epaongghâ ca-kanca bhâsa Madhurâ neng è grup whatsApp Komunitas Abdhi Dhâlem.

Èkabidhi sareng salèrana @Br@ndal Lok@ Jay@, sè maongghâ jhâjhârbâ’ân ngèngèngè definisi tor contona okara kakanthèn, èsambhit polè sareng Utsman, terros ètambâin sareng Harwiyanto, ghuru bhâsa Madhurâ neng è SMAN 2 Sumenep.

Ca-kanca neng è Komunitas Abdhi Dhâlem cè’ ghumatèna, cè’ bhârentengnga ḍâ’ bhâsa Madhurâ. Jhujuk bisaos, ka’ḍinto pan-saponapan conto macemma okara kakanthèn, ghenna’ sareng pangartèyan tor maksoddhâ.

Okara Kakanthèn

Okara Kakanthèn asallèpon ḍâri oca’ kanthè’ otabâ kanca. Ḍâlem okara kakanthèn, bâḍâ oca’ sè akanca otabâ akaèt sèttong sareng sè laèn. Macemma kakanthèn panèka bâḍâ tello’, kadhiyâ jhâjhârbâ’ân è bâbâ ka’ḍinto.

1. Ghuru Sowara

Bâḍâ ca’-oca’ sè cap-keccabbhâ aghânḍhu’ vokal sè paḍâ.

Contona:

• Sè mèghâ’ jhuko’, ko’-markoko’ sambi ako’-bhuko’. (Ḍâlem keccap Ko’ paḍâ aghânḍhu’ vokal O.)
• Tarèsnana tasèlpet, èleppèdhânna sokma sè sajân lep-lep, cellep ta’ aèber. (Ḍâlem keccap Pèt sareng Pèt, lep sareng lep aghânḍhu’ vokal E.)
• Jhâ’ ḍâ’-ngaḍâ’ ma’ lè ta’ èkennèng sadâ’.
• Mon panojjhu palang, apessa ta’ tao èlang, èpartèngka ḍer-bhenḍer èkoca’ cangkolang.
• Orèng oḍi’ kodhu asokkor, labân tatangghâ kodhu paakor, ajjhâ’ salèng pongkor.

2. Ghuru Sastra

Bâḍâ ca’-oca’ sè cap-keccabbhâ aghânḍhu’ konsonan sè paḍâ.

Baca Juga:

ACAKARBÂ

Contona:

• Onèng nongghâng, nangghung saèna. (Ḍâlem oca’ Nungghâng sareng Nangghung pâḍâ konsonan N sareng NG.)
• Bâḍâ nang-ghinang, abârna konèng è ḍâlem tennong. (Keccap Nang, Nèng, Nong paḍâ aghânḍhu’ konsonan N sareng NG.)
• Tèra’ morsa’ èkoca’ orèng bânnya’.
• Mon ta’ teppa’ kodhu dhuli paènga’ ma’ lè ta’ calonga’.
• Asakola ta’ tobâng sakalè, dhing ulangan ollè sapolo.
• Dhing abâ’ lapar jhâ’ nyarè nasè’ è ampèr, tapè kodhu nyarè è ḍâpor.
• Arèna moncar mancorong è kacerra ghumo’, èyapèt ramo’.

3. Ghuru Lumaksito

Sèttong oca’ èyangghuy lebbi ḍâri sakalèyan ḍâlem okara.

Contona:

• Sèngko’ ta’ enḍâ’ ka jhuko’ ajâm, tâpè mon ajâm potong. (Oca’ ajâm èyangghuy 2x ḍâlem okara.)
• Èbhu monḍhut gheḍḍhâng, sè èponḍhut gheḍḍhâng dhulâng. (Oca’ gheḍḍhâng èyangghuy 2x ḍâlem okara.)
• Na’-kana’ pènter bhâjheng ajhâr, bhâjheng ajhâr terro pènterra.
• Sakanca’an patang tolong, patang tolong ḍâlem kabhâghusân.
• Mènnya’ paḍâ mènnya’, ro’omma ta’ nyapo’ mènnya’ Misik.

Tambâ’ân Contona Okara Kakanthèn

È bâbâ panèka sakadhâr tambâ’ân contona okara kakanthèn. Ètokel ḍâri ḍâlem grup WhatsApp Komunitas Abdhi Dhâlem Sumenep, Ahad (9/3/2025).

Ghuru Sowara

• Bilâ mata katonḍu ajhâlân ḍu’-tasaronḍu’, makkèya èbherri’ kalḍu ta’ kèra èsoḍu.
  NB: Ḍâlem okara è attas, bâḍâ 4 oca’ ḍu: katonḍu, ḍu’-tasaronḍu, kalḍu, èsoḍu.

Ghuru Sastra

• Tèḍung aghentang è attas ghentèng o-tao ècapo’ penthong.
  NB: Okara è attas aghânḍhu’ monyè: tang, tèng, thong.

Ghuru Lumaksito

• Kobâssa ongghu orèng abhuka tapè mon abhuka bâḍâ kormana.
  NB: Oca’ abhuka ḍâlem okara è attas èkoca’aghi ḍukalè.

***