NEWS, DIMADURA – Pamarenta Kabupaten Sumenep makalowar Sorat Ederran Nomer 17 Taon 2026, tanggal 27 Maret 2026. Essena, are Juma'at kabbi ponggaba ta' olle nompa' sapedha thotthot otaba motor.
Katantowan ka'dhinto aropa'agi terrosan petoduna Pamarenta Pusat sopaja magarsare Indonesia ne'-one' ngangguy bensin tor samacemma (BBM), otamana dha' sadaja ponggaba pamarenta'an.
Bupati Achmad Fauzi Wongsojudo, tegges adhabuwagi ja' katantowan gapaneka jujuk instruksi dhari Presiden ngengenge efisiensi energi nasional mela paso'an BBM global gi' ta' nanto sabab perrang.
“Ka'dhinto kapotosan se onggu-onggu masthe ejalannagi kaangguy nagenne bannya' ta'angguyya BBM, otamaepon e lingkungan Pemkab Sumenep, menangka jawaban engatase dinamika energi global,†ca'epon Bupati Fauzi dhalem katerrangan se etarema dimadura, Sabtu (28/3/2026).
Ngabidi 3 April 2026, sadaja ponggaba, sae ASN, PPPK Paruh Waktu, tenaga alih daya, ponggaba BLUD tor BUMD ewajibbagi ngangguy transportasi non-BBM sabban are Juma'at.
Tareka se eyanjurragi bisa kalaban ajalan soko, nompa' sapedha engkol, otaba moda transportasi laen se ta' ngangguy BBM.
“Sabban are Juma'at, ponggaba enggala mangkat alako, maso' kantor kalaban ajalan soko otaba asapedha engkol, gowes se ca'epon reng samangken. Olle kalaban tareka laen, poko' ta' kengeng ngastane kendhara'an se ngangguy mennya'," tegges Bupati Achmad Fauzi.
Kajabana ponggaba se bengkona abak jau dhari kantor, mesal langkong dhari 5 kilometer, otaba kabadha'an mongsa, eyolleyagi ngastane kandhara'an se ngangguy mennya' BBM.
Hal laen se eyolleyagi, layanan publik esensial kadiya bab kasehadan tor unit kalakowan laenna se kabilang buto mobilitas tenggi.
“Pelayanan publik tidak boleh terganggu dan tetap harus berjalan efektif,†embuna, tegges ngangguy basa Indonesia.
