GHÂRḌU, Sejarah DimaduraID – Jajarba’an kalaban bul-ombul “Careta Nagara Songennep” e ka’dhinto aropa’agi settong pamanggi ngengenge sakodhi’ ronot kadaddiyan jaga-sodegga Kabupaten Sumenep anggidannepon Tadjul Arifien R kaanngguy ngaemodi Hari Jadi Kabupaten Sumenep se ka-754 taon (754th).
Serradan ka’dhinto kengeng paramaos peyarsa tor talektegi dhari tasmak pangaonengannepon bang-sebang ngengenge sejarah otaba Babad Songennep; bagian ka’dhimma se menorot paramaos lerres tor ka’dhimma se korang sae.
Tanto badan kaula dibi’ coma bisa maongga’agi ponapa ampon se eyatorragi Salerana neng e galimpo’ WhatsApp Guru Basa Madura ondhak SMP.
Saka’dhinto ca’epon caretana nagara Songennep. Ngereng peyarsa’agi areng-sareng serradannepon Sejarawan Tadjul Arifien R e baba paneka.
Careta Nagara Songennep
Arya Adhikara Wiraraja se ngadeggagi Nagara Songennep kantos samangken ampon aomor pettongatos saeket empa’ (754) taon.
Arya Wiraraja ka’dhinto menangka panonggul otama e bakto ngadeggagi Karaja’an Majapaet kantos ngalampa’agi jaman se paleng samporna enggi paneka mampo agimpo’ tor manyettong polo-polo sa-nusantara kantos mancanagara, e dhalem pamarenta’anna Prabu Hayam Wuruk.
Bannya’ Adipati se kalonta gun Songennep, akadi Panemba’an Joharsari e Tanjung Saronggi, Radin Piturut Panemba’an Mandaraga neng e Keles Ambunten, Panemba’an Wirakrama e Polo Podhay kantos dha’ Jokotole Radin Arja Kudopanole otaba se kasambat Pangeran Saccadiningrat kapeng II se longet abadi kerres, ta’ keres se dhalem lorok, ka’agungan Jaran Sembrani se megaremmeng tor kantos mampo makabun tor malares Dempo Abang dhari nagara sebrang.
Pangeran Lor sareng Pangeran Wetan, rato kembar se penonjul bajaepon Radin Patah otaba Soltan Alam Akbar Al-Fatah menangka Rato Agung Demak Bintoro, salerana kantos mampo ma’ancor tor makabun tantara Bali se ngalorok dha’ Nagara Songennep.
Penonjul perrang-epon Nagara Bali akadi Pate Kebuwaju, Guste Jalantik, Guste Pameccut, Guste Jumenna sadaja se kabun kantos eyobbar e Kampong Billa’an, Karangpanasan, Kacongan, pas karena la-balana buru ka lao’, tapapas e penggir sereng kantos enyamae Disa Penggir Papas, kabadha’anna sana’-barana’ kantos sa’at samangken.
Songennep jugan oneng eparenta sareng Pangeran Anggadipa taretan sapopona Sultan Agung, menangka Rato Agung Mataram Islam.
Bakto jaman ka’dhinto, Salerana madhateng settong bujangga se asmaepon Anggasuta, se nyepta rarenggan abadhi buja dhari aeng tase’ se kantos daddi pangoreban oreng Penggirpapas sareng Karanganyar kantos samangken.
Salerana Pangeran Anggadhipa marenta, apareng sangkolan dha’ magarsare Songennep, enggi paneka Masegit Laju neng Kapanjin, ebangon taon 1634 Masehi se gi’ paggun sodek tor segek kantos mangken.
Manabi nengale badhana Nagara Songennep samangken ampon aropa’agi settong kottha otaba kabupaten se pon aomor pettongatos saeket empa’ (754th) taon.
Sajjegga badhana Arya Adikara Wiraraja se narema kakancengan dhari Prabu Kartanagara, Rato Agung Karaton Singasari. Kabupaten Songennep ngadek sodek parjuga kantos sa’at samangken eparenta sareng para Adipati tor Bupati kantos saeket dhuwa’ (52) kanjeng se nekkem pamarenta’an dhari Arya Adikara Wiraraja kantos Bupati Achmad Fauzi Wongsojudo.
Nalekana badha pokpara se aropa’agi lalorok Pangeran Taronajaja (Trunojoyo) amoso Balanda, Songennep badha e dhalem parentana Kanjeng Pangeran Judanagara, bannya’ abanto bala panjurit ka’angguy merrange panjaja Balanda e tana Jaba.
Jugan oneng eparenta sareng Radin Ahmad Pangeran Cakranagara kapeng tello’ (III) se kasambat Pangeran Jimat se pamarenta’anna kantos ngobasane Polo Madura sareng penggir sereng dhaja bun temor Jaba Temor.
Dineng para kanjeng se ngastane pamarenta’an e Songennep kasebbut, badha sala settong Rato Bine’, enggi paneka Radin Aju Rasmana, Rato Tertanagara se pamarenta’anna pas epagante dha’ rakana se ka’agungan asma Bindara Saod, ajajuluk Radin Tamenggung Tertanagara, marenta e taon 1750 kantos 1762.
Bindara Saod ngagunge pottra Radin Asiruddin Atmajanagara, Panemba’an Natakusuma kapeng settong (I) sekasambat Panemba’an Somala amarga salerana kantos adinggal dunnya kalaban kabadha’an somala otaba samporna.
Salerana kalonta rato se longet tor ballina Allah. Sala settong bajana Bindara Saod se ka’agungan asma Soltan Abdurrahman ajajuluk Pangeran Tirtadinigrat, Panemba’an Nataningrat Soltan Natakusuma kapeng dhuwa’ (II) se marenta langkong 43 taon, dhari taon 1811 kantos 1854.
Saterrosepon pamarenta’an Songennep eparenta sareng pettong toron toronanna Kyae Abdullah, Batoampar, Luk-guluk kantos Radin Tamenggung Arja Prabuwinoto e taon 1928. Terros pas eparenta sareng Radin Tumenggung Samadikun kantos dha’ Jaman Kamardika’an kantos mangken etekkem sareng Salerana Achmad Fauzi Wongsoyudo, tor eyapenge sareng bakkel-epon Salerana Nyae Dewi Kholifah.
Badhana careta Nagara Songennep ka’dhinto, nyoppre daddiya kaca-kebbang monggu badan kaula sareng para ajunan sadaja, langkong-langkong dha’ para anom ngangodhadan, materros tor matotok abangon pambangonan, majekjek tor masodek kantos segek badhana tareka rarenggan abangon nagara tor agimpo’ bangsa.
Pangarep Salerana Tadjul Arifien
Nyambi motor nompa’ parao
Ngala’ po’lot barnana mera
Manabi pamator badha se kalero
Sala lopot nyo’ona sapora
Saka’dhinto. Malar-moga serradannepon Tadjul Arifien R e attas daddiya tambana pangaonengan paramaos DimaduraID ngengenge sejarah, otaba kalaban basa laen–kadaddiyan jaga-sodegga Kabupaten Sumenep (Songennep). Mator sakalangkong.
