10 Macemma Perrèng ḍâlem Bhâsa Madhurâ

MADURAID– 10 macemma perrèng ḍâlem bhâsa Madhurâ è bâbâ ka’ḍinto ollèna bhâdhân kaulâ makompol anya-tanya ka bângaseppo.

Mandhâr ta’ ghenna’a, saèngghâna para maos bisa nyombhâng nyebbhut nyama cem-macemma perrèng salaèn sè ampon kasebbhut.

Sanajjân ta’ ghenna’, tamaso’ jhughân jhâjhârbâ’ân ngèngèngè bhângon tor pèghunaèpon bâng-sèbângnga, palèng bhunten ka’dinto asèl bhâlângajâna jurtolès kaangghuy marampong ghâncaran ka’ḍinto.

 1. Perrèng solèng

Macemma perrèng sè sapèsan otabâ sè kapèng sèttong, èngghi ka’ḍinto perrèng solèng. Èkoca’ perrèng solèng polana bujud otabâ bhângonna perrèng panèka tèpès, kènè’ tor arowas lanjhâng, saè manabi èkaghâbây solèng (seruling).

Solèng sè emaksod èngghi ka’ḍinto alat musik otabâ sala sèttong pakakas nyè-monyèyan jhâman kona sè pagghun kaangghuy kantos jhâman samangkèn.

Kapprana, bâḍâ 7 lobâng neng è solèng; sèttong lobâng kaangghuy kennenganna nopè, nem-ennemma kaangghuy ngasèllaghi monyè (tèngghi manḍhâbbhâ sowara).

Carana aghâbây solèng, perrèng ghellâ’ ketthok sarowas, pas rao’ konco’na patèpès kaangghuy kennenganna nopè. Manabi saka’ḍinto, ta’ parlo polè lobâng papètto’, polana kennenganna nopè pon èyallè ka lobâng sè bâḍâ è konco’.

 2. Perrèng kèlès

Neng è sa-dhisa, perrèng kèlès bânnya’ èkaghâbây rèng-errèng panyangghâna ghentèng, sanggherrâ lèncak, korong, kerrè (tabir) otabâ paghâr.

Bujuddhâ sè ghi’ bungkol ethok-ketthok panè’-kènè’, sèghi’ kalabân ḍhâsar kabhutowanna; ponapa èkaghâbâyâ sanggherrâ lèncak, ponapa kèng èkaghâbâyâ korongnga mano’, tor laèn samacemma.

Lastarè èghi’-sèghi’, perrèng ghellâ’ ambhu rao’ sopajâ ta’ ngèsèl bilâ pon èyajhuma.

Maos Jhughân:

• 5 Tatengngerra Na’-kana’ Anḍi’ IQ Tèngghi
• 5 Tatengngerra Na’-kana’ Bhâkal Oḍi’ Bhâjjrâ è Buḍi Arè
• Marciano Guerrero: Bhâsa Kennenganna Bâḍâ

 3. Perrèng talè

Bujuddhâ perrèng ka’ḍinto ta’ jhâu bhidhâ sareng perrèng kèlès. Bhidhâna palèng ghun akomellan bân rowassa alanjhângan.

È Kabupatèn Sumenep, Madhurâ, bâḍâ kampong sè anyama Kampong Perrèng Talè, lerres neng è Dhisa Parsanga, Kacamadhân Kottha, Sumenep.

Ḍhimèn, ca’èpon bângaseppo, kampong ghânèka pajhât kennengngan tombuna perrèng talè. Atompo’an.

 4. Perrèng bulu

Perrèng ka’ḍinto bânnya’ èkaghâbây ghâlâ polana, salaèn bujuddhâ sè ta’ rajâ tor ta’ kènè’ ghâllu’ (seḍḍhengan), dhâghingnga tèpès. Saèngghâna cocok èpadhâddhi ghâlâ. Dhâmmang.

Sakèng sènga’ mon mogherrâ perrèng bulu, angghuy sattanang, tatpong bân kalambhi lanjhângnga, mè’ lajhu èkennèng abbher buluna. Ḍâgghi’ pas ta’ kocapa sè mogherrâ. Mèyangan kabbhi.

Rebbhungnga perrèng bulu cè’ nyamanna mon èkaghâbây rap-orap otabâ bighina ghângan. Bâcco, sèksèk, pas palappaè pateppa’. Insya Allah lemma’ ḍhâ’ârânna.

Maos Jugan:

• Pagi’ Alas Bakal Daddi Kottha, Kottha Bakal Daddi Alas
• Rangrang Oreng Lebur Nyerrat Gaguridan Basa Madura, Ka’dhinto 10 Faktor Asel Jajak Pamanggi DimaduraID

 5. Perrèng ḍuri

Se terrang para maos pon paḍâ ngaghâli kadhiponapa bujud bhungkana perrèng ḍuri. Anyama perrèng duri èngghi polana bhungkana bânnya’ ḍurina.

Dhâghingnga tebbel, rowas panḍâ’, ta’ loros alias bilu’; ta’ paḍâna perrèng kèlès. Perrèng ḍuri biyâsana èkaghâbây saksak, sanggherrâ lèncak otabâ rèngrèngnga osok.

 6. Perrèng pettong

Perrèng pettong para’ paḍâ’â bân perrèng ḍuri, sakèng bujuddhâ arajâ’ân bân abâk loros.

Adhegghâ ghâr-langghârân, kobhung otabâ gazebo ca’èpon reng Malaju, biyâsana èkaghâbây ḍâri perreng pettong.

Polana, salaèn kaabâsân gerger, perrèng pettong jhughân pajhât kaoladhân soghâ’ parjhughâ.

Manabi panjenengngan toman lèbât Kumitir, jhâlân antarana Jember bân Banyuwangi, Malang lao’ otabâ Jogjakarta, oddhi panjhenengngan ongngang kalowar, èngghâḍiyâ bânnya’ tombuna perrèng pettong.

Baca Juga: Macam

• 25 Contoh Kèrata Bhâsa dan Cara Mudah Merangkainya
• 27 Kosakata Jatuh dalam Bahasa Madura
• 61 Nama Anggota Tubuh Manusia dalam Bahasa Madura

 7. Perrèng ampèl

Palèng bhâghus perrèng ampèl mon èkaghâbây anḍhâ. Rowassa kowat, bujuddhâ ta’ lempo mara perrèng pettong tor ta’ koros mara perrèng kèlès. Seḍḍheng bân soghâ’na.

Saka’ḍinto, sanajjân para’ paḍâ’â bân perrèng ḍuri, tapè perrèng ampèl ta’ aḍuri. Sakèng mon tegghu bân komella sè jellâs ta’ jhâu bhidhâ.

 8. Perrèng konèng

Lambâ’, bâkto bânnya’ bighâlân, na’-kana’ bânnya’ tako’ sè kalowara. Saejjegghâ èghâghellângè perrèng konèng pas ollè bângalan.

Oca’na rèng seppona, perrèng konèng rèya bisa dhâddhi sèkep sopaja èjhâuwâghi ḍâri mosibâ otabâ gângguwânna mahlok jâhât, saè ḍâri bhângsa manossa otabâèpon jhin.

Salaèn kaangghuy sèkep, perrèng konèng jhughân kerrep èpadhâddhi èyasan neng è po’-compo’; kadhiyâ paghiliyânna aèng lam-kolaman, bâḍḍhâna ghucè neng è ḍhung-gheḍḍhung.

Perrèng konèng panèka tamaso’ ka’-bhungka’an sè oḍibhân, ètamen è eppot tabâ tanèyan paḍâ bisa oḍi’. Èngghi poko’ sèram mon ghi’ bhuru namen. Haha..

 9. Perrèng tolop

Manabi panjhennengngan ngoladhi perrèng nè’-kènè’ paḍâna petthèdhân è tanèyanna orèng, bârna bhungka bân ḍâunna bhiru matowa, ghânèka nyamana perrèng tolop.

Ghunana orèng namen perrèng tolop panèka kabânnya’an mènangka nap-anabhân è tanèyan kaangghuy macellep bâs-abâsân.

Bâjâ lagghu ‘tabâ malem, tèmpo bu-ambu ḍâri kalakowan, toju’ neng è ampèr sambi ngèro’ ettè nyèrut kobhi, saè sambi ngabâs kobâsaNa; lowassa langngè’, monyèna mano’ bân bhiruna nap-anabhân neng è tanèyan.

Salaèn kaangghuy petthèdhân otabâ ghâr-paghârân, perrèng tolop jhughân bisa ghâbây èn-maènanna na’-kana’: LOP-TOLOBHÂN. Mèmèssa ḍâri dhâlubâng bhâḍhek sè èbegghâ lu ka aèng.

Baca Juga: 

• 16 Contoh Seloka dan Peribahasa Madura tentang Ayam
• Lawas tapi Manis, Inilah 14 Pantun Madura yang Kalian Cari
• 21 Pantun Bahasa Madura tentang Pangantan Anyar

10. Perrèng tempor buko

Èkoca’ perrèng tempor buko polana bukona perrèng panèka apolong otabâ acampo. Perreng macem panèka tamaso’ nè-anèyan sè bisa èkaghâbây sèkep mala sanjhâta.

Ca’èpon sala settong katerrangan, manabi panjhenengngan anḍi’ perrèng tempor buko, yâktè panjhenengngan bhâkal ta’ mèḍḍhi’ èkerra’, ècokor, mala ca’èpon mèmèssa dhimbâ’ bhâkal caèr neng è bhâdhân.

Èstona perrèng buko panèka ta’ tamaso’ macemma perrèng, sakèng polana ampon ta’ kasamaran kalonta bâḍâna, ta’ sala redaksi jhughân toro’aghi neng è ghâncaran ka’dinto.

Dhaddhi, perrèng tempor buko bânnè sabhungka, bhâli’ coma sarowas (ḍu-buko). Ranca’ bukona atemmo konco’.

Saka’ḍinto ḍhimèn ghâncaran 10 Macemma Perrèng sè bisa bhâdhân kaulâ serrat è kasempadhân panèka, namong sakonè’ tapè moghâ rajâ’â pèghunaèpon mongghu para maos DimaduraID sadhâjâ. Mator sakalangkong!