Longlongan, Ghâncaran–Ramalanna para bangaseppo e Madura: “Pagi’ Alas Bakal Daddi Kottha, Kottha Bakal Daddi Alas”, samangken ampon para’ kadaddiyan.
Dullu, salaggi’ taon 1990-an, manabi badan kaula amaen ka gunong ban sakancaa’an baja laggu, bannya’ onggu ombut, acem-macem barnana bu-tombuwan.
Ta’ pera’ bu-tombuwan, manabi panjenengngan mangkat jang lagguwan bisareng karaba otaba sana’-baraja, apak-rampak lebat penggir songay entar lan-jalanan ka gunong, sambi ngabas biruna padhi se ngampar neng e saba, ramme monyena mano’ saleng ot-saodan.
Maos Jugan: Rangrang Oreng Lebur Nyerrat Gaguridan Basa Madura, Ka’dhinto 10 Faktor Asel Jajak Pamanggi DimaduraID
Mano’ keddi’, mano’ koju’, carokcok, but-embudan, bithat, mano’ tette tor mano’-mano’ laen samacemma, adduwan padha ngolok terbi’na are baja laggu.
Mano’ keskes penggir songay, mano’ eddhas bunto’ lanjang, teng-guntengan poter e tas gunong, padha ngacethot neng e attas ranca’ bungka’an raja.
Samangken, alas otaba nap-anaban neng e gunong kadiya ampon para’ tegara; bannya’ bu-tombuwan se lebur ampon eyalle ka po’-compo’, ekadagang ka kottha-kottha raja.
Manabi panjenengngan entar akelem neng e hotel-hotel tingkat tenggi, otaba ka apartemen-apartemen mewa, pas bu-ambu neng e taneyanna, panjenengngan badhi ngatela’ ne-aneyan dhari bu-tombuwan se pon esekot daddi bonsai. Lebur onggu! Cellep abasanna ka mata!
Panjenengngan ajjha’ kasambu’, ajja’ mengnga’ olle dhimma bonsai gapaneka? Bonsai se bur-lebur ganeka tanto ekaolle dhari gunong tor nap-anaban se badha e sa-disa. Argana tembus polowan–bali’ atosan juta.
Baca Juga:
Ta’ gun bonsai, sabara’ala mano’-mano’ se badan kaula sebbut e attas, ‘mangken jugan ampon rangrang; ampon bannya’ se epega’ ban ejuwal baddhai korong, egiba ka sar-pasar.
Dhoharal fasādu fil barri wal bahri bimā kasabat aydinnãs, liyudzīqahum ba’dalladzī ‘amilū la’allahum yarji’ūn.
“Ramramma kabadha’an tanto panggibat bannya’ tanangnga manossa, (ongguna se mara jareya) Allah akarep sopaja samarena, manossa padha tao ka rassana tor abali ka jalan se rida’i,” dhabuNa Guste dhalem Alquran (QS. Ar-rum: 41).
Maksod badan kaula nyaba’ ayat Alquran e attas banne kaangguy nyegga tan-taretan sopaja ambu ta’ ngobu bonsai otaba mega’an mano’ kaangguy erabat ‘taba eyobu. Bunten.
Bali’, sopaja langkong te-ngate ngala’ ka’-bungka’an se badha neng e gunong. Tako’-tako’ ka’-bungka’an gapaneka teppa’ ka canggana alam.
Ta’ sakone’ ka’-bungka’an se aomor atosan taon paggun manjeng jekjek ta’ aguli maske ecapo’ tambu angen santa’. Ta’ sakone’ bu-tombuwan neng e gunong se–maske ne’-kene’–ongguna bu-tombuwan gapaneka noro’ nyegga badhana mosiba teba ka manossa. Bencana alam, ca’epon oca’ Malaju.
Maos Jhughân:
- Macemma Ranḍhâ
- 5 Tatengngerra Na’-kana’ Anḍi’ IQ Tèngghi
- Sèmo Bhâsana Orèng Masra’aghi Mantan Lakè’ Bâkto Ghâbây
Mano’-mano’ se amonyeyan baja laggu, ambar ka taneyan e ma-roma nyare sabuter kakan, panjenengngan pega’ pas ta’ erabat kalaban teppa’, “senga’ me’ nolae,” ca’epon reng kona. Dhadhabun kona paneka kadhang pajat ta’ maso’ akkal, tape bannya’ kabukteyan.
Daddi maddha tan-taretan sadaja, padha saleng paenga’, ngabidi samangken, ngereng padha ajaga sadaja teteban paneka kalaban ate se khoso’ tor ekhlas, ta’ busenna ngajum pangabakte monggu Allah se amorba jagat, se ampon apareng sabara’ala kane’madan paneka.
Sak’dhinto bisaos ghancaran se bisa badan kaula cathet, malar moga megunane tor daddiya manfaat monggu kaodhi’an badan kaula sareng para maos dimadura.id. Salam.. tor mator sakalangkong!
Maos artikel tor berta situs DimaduraID langkong gampang neng e Google News.
