Pamarenta Songennep Masteyagi Jajan Ta’jil Bazar Ramadan 2026 Aman dhari Koman ‎

SUMENEP – Pamarenta Kabupaten Songennep, Jaba Temor, amasteyagi, kabbi jajan ta’jil se ejuwal e Bazar Ramadan 2026 aman dhari zat se babbaja (koman).
‎
Hal gapaneka epadhapa’ ‎Lora Dinas Kesehatan, Pengendalian Penduduk, dan Keluarga Berencana (Dinkes P2KB), drg. Ellya Fardasah, lebat pangladin bagiyan Kasehadan Magarsare (Kesmas), Desy Febryan.

Desy notorragi, asel panalektegan tor uji laboratorium monggu sabara’ala sampel dha’aran jugan enoman buka powasa noduwagi ja’ tadha’ gagindhu’ zat se ambabajane, ponapa pole kantos katengga’an koman (bakteri).
‎
‎“Alhamdulillah, dhari pan-barampan sampel se eyuji sareng ca-kanca e laboratorium, asella negatip kabbi. Ta’ kobater, kakanan ban enoman se ejaja’agi aman kabbi, bisa edha’ar,” ca’epon Desy, naleka ewawancara jurtoles dimadura, Jum’at (13/3).
‎
‎Panalektegan ngengenge dha-dha’aran tor enoman e Bazar Takjil Sumenep 2026 gapaneka ca’epon ampon ekalako ngabidi mokka’ are Bulan Ramadan 1447 H.

“Dinkes Sumenep ampon ngocol tim tokang talektek dhadha’aran kabit tanggal 24 Februari 2026. Sabban barung toro’ gilir epareksa,” totorra.
‎
‎Tareka gapaneka ebalangajain, ca’epon, menangka ikhtiar proaktif Pamarenta Sumenep kaangguy ajaga magarsare dhari panyake’ tor potensi rosagga kasehadan laenna, akadiya etengga’in koman. Langkong-langkong badhana zat kimia se pajat babaja.
‎
‎Pamanggina Desy, e are mamola’an powasa Ramadan, Dinkes Sumenep ta’ gun alako ngeccek dha’aran, bali’ jugan makerrep tareka baburugan becce’ tor masekken kangasteteyanna reng-oreng se mokka’ bazar.
‎
‎“Kabit mokka’ dha’-adha’na powasa’an, sakanca’an ponggaba Dinkes jujuk nyambadane sorat ederran se dhari Kementerian Kesehatan tor petodu dhari Bupati Sumenep, kodu nalektek amanna dha-dha’aran se badha e Bazar Takjil sakabbinna. Ta’ gun se e kottha, noro’ bunte’ sakabbinna puskesmas e kacamadan,” jarna’ salerana.
‎
‎Tim puskesmas se epatoron, antaraepon petugas puskesmas bagiyan kasehadan, bagiyan lingkungan, tor ta’ kalep jugan ngajak unsur lintas sektor.
‎
‎Reng-oreng dhalem tim jareya, ca’epon, jujuk ngeccek pan-saponapan dha’aran se ejuwal, sambi apareng pangaonengan monggu para dagang e kennengan bang-sebangnga.
‎
‎“E sabban kacamadan, galimpo’ pengawasan eseppowe petugas puskesmas bisareng lintas sektor. Eyeccek, sambi ebalai,” ako Desy.
‎
‎Sabatara ngengenge tareka pengawasan e tingkat kabupaten, sambung Desy, Dinkes Sumenep ta’ olle kala, jugan nganthe’ pan-saponapan instansi se badha, seperti Satpol PP, Disperindag, tor Disbudporapar.
‎
‎Kolaborasi lintas instansi gapaneka elaksana’agi guna amasteyagi ja’ tareka pengawasan keamanan pangan katekka bagus ongguwan (optimal).
‎
‎“Mela gapaneka, magarsare ta’ kengeng was-was pole, nyoppreya senneng tor tennang abalanja ta’jil, se kemma’a bai, e dhimma’a bai, poko’ se ejuwal dagang Songenneppan,” pongkas pangladin bagiyan Kesmas Dinkes Sumenep, Desy Febryan.

***