/ Esalen tor eyanggit sareng Tadjul Arifien R.
GARDU SEJARAH, DIMADURA– Dyah Wijaya otaba Sangramawijaya jumenneng Rato Agung e karatowan agung Majapaet kalaban abiseka otaba jajuluk: Prabu Sangramawijaya Sri Maha Nindita Kertarajasa Jayawadhana, salerana rato agung se parjuga tor kalonta tatak dhalem tareka perrang. Asmana sasat ta’ kasat dhari rarasan para kabula sa’antero jagat, para sattrona padha ngetter se atellok tor anot dha’ ajunanna, sanare ta’ sa’addhep dhalem lorok.
Panganggep tor pangesto para kabula akadi aseba dha’ ka dhiba morba jagat amarga lakar daddi kakoduwan ka’angguy abakte. Ekatodhusi, ekasengkae tor ekaneserre sadaja kabula, sana’ baraja jugan sattro. Amarga salerana menangka satreya penonjul, tantona ce’ ngagalina dha’ sadaja pangamre kabulana.
Sogi dari tengka sola ban tareka se ka’angguy matellok moso sanare sakte talebat, sasat ta’ kapekker pola tarekana. Gan mereng asmana salerana, para sattrona ngetter gagujuden, tadha’ katatagan se meddal, sadaja karsa juba’ englep cellep sasat tasellep.
Pamanggina parjuga akantha pandhita, alos nyarepsep kantos dha’ panggaliyan se socce tor bellas neser dha’ sadaja kabula. Dhabuna akanta tembang kasmaran magumeccer tor makapencot kabula se merengngagi.
Dhari apangangguy lampa tor tengka bagus, nambai tera’ dha’ salerana se lakar bagus, kantos are katon sorem arassa todus se nyonara. Akantha batara se merte tana Jaba daddi pajung pangaoban kabulana, kabbi kabula anot, nonot, tor manot, pantessa daddi mostekana bume.
E dhalem prassati Panampihan ban prasasti Wurare / Mahasobhya esebbuttagi badhana okara Kertarajasa Jayawadhana agandhu’ artean:
- Kerta agandhu’ arte: salerana ngembadi mateppa’ tor merte tana Jaba dhari sabadhana pokpara se elakone para panjajak kaangguy nyepta’agi sampornana magarsare, akadi mata are se nera’e bume.
- Rajasa agandhu’ arte: salerana banget mampo ngoba kabadha’an se petteng kantos tera’ tar-kataran amarga katatagan salerana natkalana ngadhebbi moso, kantos mangancor moso.
- Jaya agandhu’ arte: salerana ka’agungan bul-ombul mennang se aropa gagaman trisula se akonco’ tello’, amarga kalaban badhana gagaman jareya moso bakal ancor ta’ ekenneng asak.
- Wardhana agandhu’ arte: salerana mampo maodhi’ sakabbiyanna agama (paneptep panatagama), mabannya’ asel bume tor mama’mor nagara ban bangsana.
GARBA (PARA RAJI) SANGRAMAWIJAYA
– Nokel dhari Kakawin Nagara Kertagama, Gatra XLVI, kalaban TBG Sorandaka
Prabu Sangramawijaya Sri Maha Nindita Kertarajasa Jayawardhana Rato Agung nagara Majapaet esandhingi kalaban binihaji kinapatanira (para garba/raji) karteka empa’ se nyonar dhari sandhinganna, se meddal dhari raddin salerana se padha pottrena Parabu Kartanagara, Rato Agung Singasari, se lakar epelala kalaban pengetan dhari gi’ temor kantos dibasa.
- Garba padme (permaisuri) pottre sareyang kalaban asma Tribuwaneswari, salerana sasat tera’na bulan pornama, socana morka’ nandha’agi jemjemma panggaliyan, lesanna kaolat mesem sanajjan agandhu’ sekkel, kole’na koneng gaddhing ngamennyor, atendak sasat nedda’ bilis ta’ lessa’a. Apangangguy ban apangaba’ mahalalita se pelak nata okara, se kecca’ mentel keccap, ta’ asor atanggin dhabu.
- Garba ampeyan otaba raji kapeng dhuwa’ Mahadhewi Nahendhradhuhita, raddinna samporna akadi pottre sasat ta’ kasedding panassa are, elerek pantes epandeng ta’ busen, ngalemes aeng se nengga’ dha’ kole’na se lembu’, lemmes, alos akadiya daddi gambaran dha’ tengka gulina,
- Garba ampel otaba pangapet, raji se kapeng tello’ Jayendradewi Pradnya Paramitha raddin talebat akadi bidaddari se toron dhari langnge’, ales andhaun memba, bulu tengalla akadi bilis abaris, bibirra anjerruk salone, pepe ngalompang semmo mamera, kaom bini’ padha kasengsem ngabas salerana, apa pole kaom lake’ padha tadha’ se kellar ngampet rassa ka’angguy ta’ kapencot.
- Garba pongkasan, Gayatri Ragapadmi, socana morka’ mella’ ta’ mare, kaolat ta’ toman lesso adina mesem e bibir jerruk salone, tengkana baranca sanaos totorra paggun alos, sowarana kapereng akadi tembang ton-lantonan apangereng soleng dhari langnge’ peng petto’. Tadha’ oreng se aromasa ta’ senneng ngoladi salera, totor tor tengkana.
Mator sakalangkong. Laggi’ badha terrosanna …..
