41 Contoh Paparegan Madura 4 Baris

Bârunengnga ngennèng mènnya'
Èrampat sè amacaa
Jhâ' neng-senneng bâḍâ è dhunnya
È akhèrat èsèksaa

Dhâghing kata' palèng powa
Taḍâ’ ongghu ra'-ora'na
Ngèding oca'na rèng towa
Ajjhâ' sangkal sa oca'na

Ḍâ' ḍâjââ ḍâ' lao'a
Mèkol lanḍu' ngeppè' buku
Asomajâ jhâ' noro'a
Pokol bâllu' ḍateng ongghu

Bâḍâ nyangsang è pakèbânna
Bân-abân èntara nyassa
Jhâ' sang-posang pamolèna
Najjân kèbân anḍi' rassa

Ècang-koncang komèrèna
Èkoncang komèrè kotong
Jhâ' sang-posang pamolèna
Sè èkaposang èkarontong

Gheḍḍhâng sabhâ ampon nongkol
Ghadhebbhungnga jhâ' ca-cacca
Bilâ dhika apol-kompol
Patè-ngatè sè acaca

Ghâi' bintang ghâgghâr bulân
Paghâi'na pangghângnga ajâm
Kaka' èntar ghân sabulân
Paèntarra nangghâ'â bâjâng 

Ghâghâmbhâng kaju angsana
Bilis ghâtel è ranca'na
Etèmbhâng ka ponapana
Sakèng nèser ka oca'na 

Ghâi' bintang ghâgghâr bulân
Paghâi'na kalanceng potè 
Kaka' èntar nèng sabulân
Paghi' mandhâr ḍâpa'a polè  

Jhâmbhu bârâ' jhâmbhu ḍhâḍhu 
Cè' lebâssâ abâsânna
Sè bârinto dhaddhi padhu
Pon ta' lèbur bekkasânna 

Karato' nèko wa-towa
Bâḍḍhâi pèrèng sarombân
Bârinto dhika taowa
Bhidhâna orèng bi' kèbân

Ajâm tao sakè' kèya
Kocèng toman tèḍung kèya
Kèbân sarombân pokalla
Manossa angghuy akkalla

Ka Bhâli nangghâ' sarkajâ
Seppeddhâ bâḍḍhâi bubu
Bilâ paghi' bulâ pon rajâ
Amènḍhâ'â rama èbhu

Lorong kènè' pèngghir ḍâjâ
Klanceng potè mara tonjhung
Pong ghi' kènè' omor ngoḍâ
Pabhâjheng nyarè pènjhung

Mano' kwacè nyarè bighi
Lamon Iarang mellè tonjhung
Pènter soccè buḍḍhi tèngghi
Ajhi Iarang lebbi monjhung

Mellè cangkèr è pasar mènggu
Ejâ-kajâ kèng terronam
Mon èpèkkèr klabân ongghu
Nyata rajâ panarèmana

Namen maghi' tombu sokon
Cabbhi jhâmo nèko ranran
Orèng oḍi’ kodhu rokon
Kabbhi pasarmo jhâ' tokaran

Nono opak nono kèpèng
Nono bhândheng ḍâ' marḍâna
Mon èkoca' jhâ' nampèlèng
Nèko seḍḍheng bân salana

Ngarè' lalang ngèbâ kalèlès
Les-palessa ngennènga nila
Bulâ palang ta' tao nolès
Ḍâri malessa asakola

Ngangghuy songko' ḍâri ghluddhru 
Asarongan nompa' vèspa 
Ta' noro' ḍhâbuna ghuru 
Salanjhângnga abâ' nèspa 

Ngobbhâr dhupa ḍâlem roma 
Klambhi tebbâ' asarongan
Jhâ' Ioppa bhuṭok sèramma
Buwâ lebbhâ' long-polongan

Ngarè' belta ngèbâ saḍâ'
Mon motta è kèbâ kèya
Taḍâ’ kasta nèng è yaḍâ'
Ghi' kasta è buḍi kèya

Ngala' mènnya' asoroya
Ngala' kaca tabing ḍâjâ
Kodhu ènga' sèpat asorra
Nyopprè abâ' ajhina rajâ

Ngarè' lalang tombu ghânjhi
Ngowan bhellu ka labbhuwân
Bulâ palang ta' tao ngajhi
Tabhâlillu ka tabbhuwân

Nyabâ' tales ḍâri bhânjhâr
Palaèn ḍâri ghettana
Abâ' males sengka ajhâr
Samangkèn karè kastana