“Ella. Sèngko’ mara patè’è. Ghun bâ’na sè bisa matè’è sèngko, mènangka orèng sè nolès carèta tentang sèngko’,” Marlèna nerrosaghi permènta’anna.
“Lamon sèngko’ matè’è bâ’na, carèta arèya pas marè. Ta’ usa terrosaghi,” ca’na sèngko’.
“Sèngko’ la ta’ kowad oḍi’. Tang atè ancor. Sèngko’ èfitna amaèn sir-essiran kalabân Ahmad. Pas sèngko’ èdhina’aghi bi’ tang lakè, Ka’ Mahfud. Apapolè sèngko’ pas ètellak tello.”
“Poko’na, sèngko’ ta’ bhâkal matè’anna bâ’na.”
“Bhuh. bâ’na ènga’ pappa’an takaè’.”
“Bâ’na jhâ’ sossa. Poko’ bâ’na jhâ’ mènta patè’è, sèngko’ bisa maḍâteng bânnya’ lalakè’ èḍâlem carèta sè laèn. Apapolè, bâḍâ pan-bârâmpan lalakè’ sè atanya nomer tèlponna bâ’na. Rèng lakè’ bânnè coma sèttong, bânnè coma Mahfud. Bânnya’ rèng lakè’ sè terro ngabhârengnga bâ’na è ḍâlem oḍi’na.”
Marlèna mandheng tasè’ sè lèbar, ngambâ’ angèn sè ngalesser, bân ngabâs parao sè èyonjân angèn. Atèna Marlèna ongghu-ongghu ancor, paḍâ bân kaca sè ancor ta’ bisa èpasèttong polè.
