Kaoḍi’ânna Marlèna cè’ roweddha, paḍâ kalabân bula salbut sè ta’ èkennèng èyajhum polè.
Sèngko’ pèra’ aghellâ’ kadhibi’ân. Bâḍâ pamaèn carèta panḍâ’ kèng ta’ enḍâ’ èyator bi’ sè nolès. Abâ’na aghughât mènta patè’è polana carètana ta’ ghellem majhembhâr ka abâ’na. Sèngko’ lakar nolès carètana Marlèna èpadhâddhi pamaèn otama.
Sèngko’ aghâmbhârâghi kabâḍâ’anna Marlèna aropa’aghi bâbine’ sè raddhin, lèbur nyarè èlmo, tor lèbur ḍâ’ bhâlâ tangghâ.
Salaènna jarèyâ, sèngko’ aghâbây Marlèna segghut katèbhânan musibâ. Marlèna bânni bâbinè’ sè samporna. Mèlana, ḍâ’ rèng-orèng sè maca carètana Marlèna, lamon bâḍâ pola tèngkana Marlèna sè ta’ bhâghus ta’ usa toro’.
Ropana, Marlèna ghi’ ta’ bisa aloppa’aghi Mahfud, lakèna, sè la ataonan oḍi’ abhâreng Marlèna. Tarèsna sè bâḍâ è ḍâlem atèna cè’ cekka’na.
Sabbhân arè, Marlèna lako nyarè Mahfud; ka romana, ka pèngghir sèrèng, ka gârḍu, otabâ ka pasar. Marlèna posang ka bârâ’ ka tèmor, paḍâna orèng sè loppa ka romana dhibi’.
