È ḍâlem atèna, Pa’ Ajjhi akarettek, arta sè bânnya’ ta’ bisa èporop kalabân na’ poto sè ta’ samporna, sè èlang akal. Bhâ’ bhenderrâ Marlèna ècapo’ dhuwâ bi’ Mahfud sopajâ dhâddhi orèng sè akalla ta’ samporna?
Sabelluna abâli polè ka mancanaghârâ, Mahfud ekataowè èntar ka Kalèanget. Lakar kalonta è kennengngan kasebbhut bânnya’ orèng sè rad-nyaraddhi orèng lakè-binè sè ta’ rokon, otabâ marosak tarèsna sè pajhât abhukel.
Mahfud èkakabhâr mènta sarad kaangghuy matapèngsor atèna Marlèna sè aropa’agghi bâbâles ḍâ’ tèngka-polana sè ta’ beccè’.
È sèttong malem, bâḍâ orèng sè nemmonè Mahfud maca dhuwâ, sampè’ èkaèding ḍâ’ ka budina romana.
Panèka masangnga ajhina èsmo kèrèm
Panapa’aghi angèn sa lèbung
Ka atèna Marlèna ḍâ’ ka atè ingsung
È ka nangès nangès
Atèna Marlèna ḍâ’ ka atè ingsung
È kabâriyâng bâriyâng
Atèna Marlèna ḍâ’ ka atè ingsung
È ka asè asè
Atèna Marlèna ḍâ’ ka atè ingsung
Mahfud apowasa motè abiddhâ salèkor arè. Sabbân arè coma asaor bân abhuka nasè’ potè kalabân bujâ. Powasa kasebbhut èghibâ sampè’ ka mancanaghârâ.
Sajân abit, Marlèna bânnè coma acaca kadhibi’ èbâbâna bhungkana pao, è aḍâ’na romana. Marlèna posang-talèngsang, pèkkèranna sajân èlang, abâ’na sajân ta’ ro-karowan.
