Pa’ Ajjhi, rèngtowana Marlèna paḍâ posang. È sèttong bâkto, Pa’ Ajjhi ḍâtèng ka roma, mènta ghâbâyâghi carèta tentang Marlèna sè cè’ bhâghussâ. Tapè, taḍâ’ manossa sè samporna. Kabhâghusanna orèng bisa ètèro, kakoranganna orèng bisa dhâddhi pangajhârân ḍâ’ ka abâ’.
“Ka’dinto ta’ bisa, Pa’ Ajjhi,” ca’na sèngko’.
“Sèngko’ toḍus ka sè maca carètana Marlèna. Marlèna èyangghep bâbinè’ sè ta’ genna,” ca’na Pa’ Ajjhi.
“Anèka kan ghun carèta, bânnè ongghuwân, Pa’ Ajjhi” ca’na sèngko’ kalabân alasan sè teppa’.
Pa’ Ajjhi pas molè. Mowana ta’ jhembhâr, nandhâ’aghi bâḍâ rassa kocèbâ è ḍâlem atèna.
Ḍâpa’ ka romana, Pa’ Ajjhi nemmonè Marlèna toju’ è bâbâna bhungkana pao, è aḍâ’na romana, acaca kadhibi’ân, ta’ ngangghuy koḍung, obu’na akaronḍâng ka aḍâ’na ḍâina.
Marlèna ngorot obu’na ghân pan-bârâmpan lembâr, paḍâ bân orèng nemmo koto sè agâlâjâr è cèthak. Atèna tapèngsor ka Mahfud. Marlèna sapertè acaca kalabân sèttong orèng. Bâḍâ sèttong nyama sè lako èsebbhut: Ka’ Mahfud.
Pa’ Ajjhi ghun mandheng Marlèna sambi ngosap ḍâḍâna. Atèna ta’ tèghâ nangalè ana’na tapèngsor ka sèttong lalakè’ sè pajhât lakar la aberri’ katoronan.
