DIMADURA.ID – Ada banyak permintaan dari taretan Madura yang masuk ke meja redaksi dimadura.id agar menyajikan Contoh MC Bahasa Madura (parenteng lampa) menggunakan model kesusastraan khas Madura.
Nah, teruntuk taretan Madura dimanapun Anda berada, berikut radaksi hadirkan naskah MC (master of ceremony) yang di dalamnya memuat lalongèt atau khas sastra bahasa Madura, berikut juga link download dokumen di bagian akhir artikel.
MC Bahasa Madura ini disampaikan Taretan Harwiyanto, Guru Bahasa Madura SMADA Sumenep, pada malam perayaan ujian atau Haflatul Imtihan di Lembaga Raudlatun Nasyi’in, Desa Tengedan, Kecamatan Batuputih, Sumenep, Jumat malam tanggal 2 Juli 2021.
Ejaan teks MC Bahasa Madura dalam artikel ini kami sajikan dengan format penulisan ejaan berdasarkan hasil Sarasehan 1973, menyusul artikel serupa berikutnya menggunakan ejaan hasil Kongres Balai Bahasa Jawa Timur (EYD, 2008-2011).
Assalamualaikum Wr. Wb.
Bismillahirrahmānirrahīm..
Salam Pamojina Parenteng Lampa
Innal hamda lillāh. Nahmaduhū wa nasta’ienuhū, wa nastaghfiruh, wa na’ūdzubillahi min syurūri anfusinā wa sayyi’āti a’mālina.
Man yahdihillāhu falā mudhilla lah, wa man yudhlil falā hādiya lah.
Asyhadu an lā ilāha illallāh, wahdahu lā syarīka lah. Wa asyhadu anna Muhammadan ‘abduhū wa rasūluh. Amma ba’du:
Parenteng Lampa Nyapa Para Rabu
Karengga sareng sadajaepon kahormadan, jugan songkem pangabakte, ta’ cokba tettep kaatora dha’ para ulama’ tor para keyae se kaonang penter socce menangka kaca kebbang monggu magarsare.
Kong-langkong, kaatora dha’ saleraepon se molja: Kiai Haji Malik Sanusi, se rabuwepon dhari Rak-arak Kabupaten Bandabasa, menangka penceramah (guru ngaji) e saat malem mangken ka’dhinto.
Jugan saleraepon se molja: KH Mohammad Nurrasyidi, menangka pangladin jugan se nyepowen Yayasan Raudlatun Nasyi’in, para bangaseppo tor keyae laen se ampon soddi rabu tor alonggu e kennengngan ka’dhinto.
Tantowepon, badan kaula ta’ bakal nyebbut asmaepon bang-sebang, nangeng malar moga ta’ kantosa andaddiyagi korangnga rassa hormat jugan songkem pangabakte badan kaula monggu para ajunan.
Ta’ kalep jugan, saleraepon para bangaseppo, tokoh masyarakat, sadaja guru ngaji, kong-langkong, jugan Lora kalebun se jumenneng mangko bubbuwan neng bume Disa Tengedan, se molja Bapa’ Mangriadi sareng sadaja pamerte disaepon.
Saleraepon se molja, sadaja ustadz tor ustadzah, ngabidi ondhak RA, MI, kantos SMP Plus Raudlatun Nasyi’in.
Jugan sadaja balli santre se tanto same settong pangara se eyajum daddiya pengaro, se moddha rassa asor mano’ panyo’onnepon. Saleraepon se molja, sadaja onjangan para anom, para ebu se ampon alonggu jimet parjuga e kennengngan ka’dhinto.
Sadaja red-mored, kong-langkong wisudawan-wisudawati se same gumbira.
Sajarango bang pote, sabuko petotor neng lat-selladda kabidan ator, badan kaula sareng para ajunan, se salaggi’ ngako abantal syahadat asapo’ iman sandhing rasulullah, rassa parjuga nyongler thok-lanthogga okara pamojja se ngalenang nanemang poji sokkor Alhamdulillāhi Rabbil Ālamin ka’ator dha’ Guste Allah se amorba alam, amarga kalaban tometa karsaepon, badan kaula sareng para ajunan, salaggi’ kapareng ne’mat komena se alompa jagat, kantos kaedi kaanguy agin-panggin e kennengngan ka’dhinto, dhalem settong tareka agung: Haflatul Imtihan Raudlatun Nasyi’in, tanggal.. bulan.. taon..
Salawat jugan salam malar moga tettep ka’atora dha’ kaca kebbang molja, Guste Rasulullah pornamana alam, se ampon arako’ maddhai karep, ngangkes badan kaula sareng para ajunan dhari jurang kama’seyadan, dhari alam kabudhuwan nojju dha’ alam se tera’ tar-kataran, enggi ka’dhinto kalaban badhana dienul Islam.
Para rabu se padha alonggu jimet parjuga, tartep jatmeka
Mator rancanganna badan cangkolang, badan kaula komalancang ato’or pamator, saat samangken badan kaula kengeng pakon bubbuwan molja menangka parenteng lampa.
Pangarep manggi okara se pas-ngeppas, agagembang lemma’ manes, pae’ maddu, nangeng rassa ta’ jajak, marga laggi’ nyeccengnga pekker dume’na akkal, kajalla panengal. Pramela, moga ta’ badhi rapa’ moddha, dhadha ngambuwagi dhadha, saebu dudukan rassa esandhanga e attassa bun-embunan.
Nyo’on edi, malar moga kalellan, badan kaula menangka parenteng lampa, badhi ngatorragi pan-saponapan rentengan otaba anthat lampa se insya Allah badhi kalampan saat malem samangken ka’dhinto.
Anthat Lampa
1. Lampa se sapesan enggi ka’dhinto pamokka’, Qira’atul Qur’an;
2. Lampa se kapeng dhuwa’ enggi ka’dhinto pamaosan salawat nabi;
3. Lampa se kapeng tello’ enggi ka’dhinto, dhadhabun otabepon sambutan;
4. Lampa se kapeng empa’ enggi ka’dhinto, tareka wisudawan-wisudawati;
5. Lampa se kapeng lema’ enggi ka’dhinto, penobatan siswa tauladan;
6. Lampa se kapeng ennem enggi ka’dhinto, dhadhabun kaagamaan otabaepon ceramah agama se badhi edhabuwagi sareng se molja KH Malik Sanusi;
7. Lampa se pongkasan enggi ka’dhinto, panotop otabaepon du’a.
Sabellunna ekabidi, parlo ekagali monggu dha’ sadaja para rabu, pan-saponapan rentengan lampa se ampon kaator ka’dhinto, bisa aoba, gumantong kabadha’an otabaepon kasaroju’an.
Ngabidi Lampa
1. Ngereng kabidi lampa se sapesan, enggi ka’dhinto pamokka’, se badhi ebukka’ kalaban Qiratul Qur’an, se badhi emaos sareng saleraeon se molja Ustadz Mohammad Risno.
Dha’ saleraepon se molja Ustadz Mohammad Risno, bakto kaator
— — —
Mator sakalangkong, malar moga badan kaula sareng para ajunan, se maos jugan se meyarsa’agi same kengeng ganjaran dhari Allah SWT, tor jugan malar moga lampa e saat malem samangken ka’dhinto kalampan kalaban bajjra, lomanjar, ta’ manggi aral pokpara tor cacoban, kengeng rida’epon Allah SWT.
2. Nangros anthat lampa se kapeng dhuwa’, enggi ka’dhinto: pamaosan salawat nabi se badhi èpertè sareng grup salawat An-Nasyi’in.
Dha’ saleraepon se molja Ustadz Mas’udi sareng kanca pangerengngepon dhari grup salawat An-Nasyi’in, bakto kaator
— — —
Saka’dhinto para rabu, menangka rentengan lampa se kapeng dhuwa’. Malar moga badan kaula sareng para ajunan same kengeng syafa’attepon Guste Kanjeng Nabbi Muhammad SAW.
Malar moga ta’ namong ko-ngakowa, nangeng malar mandar kaakowa menangka ommattepon, se salaggi’ lolot ate dha’ lampaepon.
3. Lampa saterrossepon enggi ka’dhinto: dhadhabun, se ca’epon reng Malaju, sambutan, se badhi edhabuwagi sareng se molja: KH Moh Nur Rasyidi, menangka pangladin se nyeppowe Yayasan Raudlatun Nasyi’in.
Dha’ saleraepon KH Moh Nur Rasyidi, bakto kaator
— — —
Saka’dhinto para rabu, dhadhabun dhari saleraepon se molja KH Moh Nurrasyidi menangka pangladin se nyeppowe Yayasan Raudlatun Nasi’in.
4/5. Anthat lampa saterrossepon enggi ka’dhinto tareka penobatan siswa otaba siswi tauladan, eterrossagi kalaban prosesi wisudawan tor wisudawati.
Dha’ saleraepon se kabubbuwan pakon kaangguy merte jalanna lampa prosesi penobatan siswa otaba siswi tauladan, bakto kaator
— — —
Saka’dhinto para rabu, menangka tareka penobatan siswa tauladan tor prosesi wisudawan-wisudawati RA, MI jugan SMP Plus Raudlatun Nasyi’in.
Malar moga sadaja red-mored se ampon ewisuda saat malem samangken ka’dhinto kengeng elmo se barokah, megunane, daddiya lantaran jalan kasamporna’an e dunnya kantos akherat.
6. Lampa saterrossepon enggi ka’dhinto: babulangan agung se badhi edhabuwagi sareng saleraeon se molja KH Malik Sanusi, menangka pamerte otabaepon pengasuh Pondhuk Pesantren (Ponpes) Nurussyaf, Rak-arak, Kabupaten Bandabasa, jugan badhi nerrossagi kalaban pamaosan du’a.
Dha’ saleraepon se molja KH Malik Sanusi, bakto kaator
— — —
7. Panotop
Saka’dhinto totok ampon lampa e saat malem mangken. Badan kaula menangka parenteng lampa, se gi’ ta’ tao lebat e babana baringen, ngabidi dhari awwal kantos akher, manabi badha tor-ator se korang sonduk dha’ panggaliyan para ajunan, nyo’ona sapora se tadha’ batessepon.
Panotop, wa billahittaufiq wal hidayah, tsumma assalamu alaikum Wr. Wb
