DIMADURA.ID–-Paneka duwana reng terro lekkasa ongga ajji, genna’ sareng artena, arte basa Madura.
Kadiya ampon ekabarragi Republika, Rebbu (11/1), Arab Saudi ampon nantowagi ja’ ommat Islam dhari ka’dhimma’a bisaos bisa mangkat ajji taon samangken.
Tadha’ batessan saponapa kouta haji se bisa mangkat ka Tana Socce kadiya dhutaon se tapongkor. Naleka masana Covid, jama’a ajji ta’alang kalaban atoran-atoran lockdown.
Taon 2023 mangken, Indonesia kengeng kuota 203.320 jama’a reguler, dan 17.680 jema’a khusus.
Namong saka’dhinto, jama’a ajji Indonesia, langkong-langkong se dhari Madura, pasthena gi’ kobater ta’ bisa mangkat taon mangken. Melaepon ampon tello taon jama’a ajji se pon adaptar burung se mangkada sabab pandemi.
Ampon, buwang pajau kakobaterannepon panjenengngan, enggal nyo’on tor marobbu ka Allah kalaban tareka e baba ka’dhinto.
Baca Juga: Sèmo Bhâsana Orèng Masra’agi Mantan Lakè’ Bâto Ghâbây
Tareka Sopaja Tekka Hajat Ongga Ajji
Se sapesan, eyatore maos Alfatehah kalaban ngarep rida’epon Allah SWT. Terros pas maos du’a e baba ka’dhinto:
Li ridha’illahi, Alfatehah..
Bismillāhirrahmanirrohim..
Allāhumma shalli alā sayyidinā Muhammadin wa ‘alā āli sayyidinā Muhammad, wal hamdu lillahi robbil ālamīn..
Allāhumma ballighnā Makkata wal Madīnata li’adā’i nusūkina wa li ziyāroti harōmika harōmi sayyidinā Muhammadin yusron wa lā ‘usron, ma’arrōhati wassalāmah.
Allāhummarzuqnāttaqwā wal istiqōmah, wa husnal khōtimah.. (3 kale ka attassagi)
Allāhummaj’al hajjan mabrūron wa sa’yan masykūron wa dzamban maghfūron wa ‘amalan shālihan maqbūlan wa tijārotallan tabūr..
Rabbanā ātina fiddun’yā hasanah, wa fil ākhiroti hasanatan wa qinā ‘adzābannār..
Wa shallallāhu ‘alā sayyidinā Muhammadin wal hamdu lillāhi rabbil ālamīn..
Baca Juga: Contoh Teks Sastra MC Bahasa Madura
Arte Basa Madurana
Kalaban nyebbut Asmana Allah se Apareng ja-rajana ne’mat tor bu’-lembu’na ne’mat. Ajunan Mahabellas tor Mahaase.
Ya, Allah.. Shalawattepon Ajunan moga langgengnga dha’ towan adan kaula sadaja, Nabbi Mohammad, jugan dha’ sana’barajaepon.
Alhamdulillah, sadaja poji coma pantes kaagunganna Ajunan ya, Allah.. Pangeran se amorba jagat.
Ya Allah, moga Ajunan Dalem madhapa’a badan kaula dha’ ka Makkah sareng Madinah kaangguy nekkane ebada, aziyaroh dha’ Tana Harammepon Ajunan Dalem; Harammepon kakasena Ajunan, Guste Kanjeng Nabbi Mohammad, kalaban gampang, ta’ malarat, senneng tor salamet.
Ya, Allah.. pareng abdina rassa pangatako’ tor jekjek, husnul khotimah bagus dhi-budhina.
Ya, Allah.. andaddiyagina Ajunan Dalem badan kaula Ajji se mabrur, tareka se ekasokane kalaban sokkor, dusa esapora, amal becce’ se katarema, dagang se ta’ marogi..
Ya, Allah.. neba’agina Ajunan Dalem dha’ abdi dalem kaodhi’an dunnya tor akherat se bagus, jaga’agi abdi dalem dhari seksa apoy naraka.
Ya, Allah.. rahmattepon Ajunan moga terros langgengnga dha’ towan didalem sadaja, Nabbi Mohammad.
Sadaja poji sokkor coma pantes kaagunganna Junandalem, Pangeran sadaja alam.
Saka’dhinto Duwana Reng Terro Lekkasa Tekka Hajat Ongga Ajji. Eyatore maos sabban bakto kalaban ate se ngadhep.
Langkong sae duwa ka’dhissa’ etoro’e kalaban maos Alquran sorat Al-Baqarah ayat 128 e baba ka’dhinto. Ayat ka’dhinto aropa’agi duwaepon Nabbi Ibrahim sareng pottrana, Nabbi Ismail.
Saka’dhinto ayattepon:
رَبَّنَا وَاجْعَلْنَا مُسْلِمَيْنِ لَكَ وَمِن ذُرِّيَّتِنَا أُمَّةً مُّسْلِمَةً لَّكَ وَأَرِنَا مَنَاسِكَنَا وَتُبْ عَلَيْنَا ۖ إِنَّكَ أَنتَ التَّوَّابُ الرَّحِيمُ
“Rabbanā waj’alnā muslimaini laka wamin dzurriyyatinā ummatan muslimatan laka, wa arinā manāsikanā watub ‘alainā innaka antat-tawwābur rahīm”
Artena: “Dhu.. Guste badan kaula, anddaddiyagina Junandalem dha’ di-dalem kadhuwa menangka kabula se taat dha’ Junandalem, sapaneka jugan na’-poto di-dalem moga daddiya ommat Islam (tundhu’), ajari di-dalem tareka tor cara ngalakone ebada ajji. Sapora’agi dusa-dusa di-dalem. Ajunan dzat se Maha narema tobat tor Mahaneser dha’ sadaja mahlok-epon Junandalem.”
Kalaban monte’e panyo’on kalaban ayat gapaneka, panjenengngan para maos dimadura.id (lake’-bine’), insya Allah jujuk lekkas edikane kaangguy duli mangkat dha’ Makkah tor Madinah menangka tamoyya Allah.
Malar moga onggu tekka hajat. Amiin.. Duwana Reng Terro Lekkasa Ongga Ajji, Genna’ sareng Artena
