CARPAN DIMADURA – Bannya’ ru-guru se asokwan e sakola’an, se ngarep e budhi are, kapareng edhi tor kabajjra’an daddi ponggaba.
Dhari Jaman Balanda kantos pasukanna Nippon ajaja tang Nagara, oreng-oreng paggun ta’ bu-ambu se ngarep daddi ponggabana Pamarenta.
Asabab, biaya odhi’na dhari masa alako e bakto gi’ ngodha kantos towa badha se nanggung; etanggung Pamarenta.
Ecareta’agi ja’ lamba’ Ir. Soekarno tor Hatta, sabellunna daddi Presiden ban bakkel Presiden Nagara Indonesia, epenta kaangguy daddi ponggabana Pamarenta Balanda.
Tape oreng se kadhuwa mele jalan Laen. Iya areya jalan mamardika nagara. Odhi’ sossa ta’ daddi masala. Dammang berra’ dha-padha ejalane, ngopene settong pangarep se bak raja sopaja nagara Indonesia Mardika!
“Ba’na olle dhari dhimma careta jareya. Ma’ lebur edhinganna? Sakeng tanto ta’ kera lebur ejalane na’-kana’ jaman sateya,” ca’na Sipul ka Pidal.
“Dhari Oca’na Katowa Yayasan Indonesia Mengajar,” saodda.
“Ba’na lebur maca keya, Dal?”
“Iya, lamba’ gi’ engko’ noro’ asukwan daddi guru. Sateya kan la ambu.”
“Arapa ba’na ma’ ambu asukwan.”
“Gaji kene’, kalakowan bannya’.
“Jareya nyamana ta’ asokkor ban ta’ sabbaran.”
BACA JUGA:
- 20 Poster Kata-kata Inspiratif Tokoh Dunia dalam Bahasa Madura
- 20 Pantun Paparekan Lucu Kocak Bahasa Madura
Sipul nyareta’agi ja’ sateya bannya’ oreng-oreng se pojur, asabab sabbar ajalane kalakowan asukwan.
Pidal mesem ngedhingngagi caretana kancana. Sateya aba’na ajalane kalakowan laen. Ta’ ngajar pole e sakola’an.
“Pul, engko’ ngedhing tang kanca la eyangkat daddi ponggaba. Kabar areya bendher apa enja’, ya?”
“Sapa nyamana, Dal?”.
“Toyyiba.”
“Iya, Jareya la buktena, Dal.”
“Bukte apa?”
“Bukte ja’ jaman sateya ta’ kera badha oreng bangal nola’ daddi ponggaba padhana laggi’ jamanna Soekarno-Hatta.”
Pidal mesem, asabab arassa aba’na ecampoleyagi ban Sipul.
“Dal, ba’na caretana lebur onggu.”
“Pul, pola sateya ba’ badha’a ya, oreng ngarep ta’ daddiya ponggaba, ban mele jalan parjuwangan laenna?”
“Iya. Paggun bannya’. Tape apa gunana ba’na ban engko’ acaca soal jareya, Dal.”
“Sateya jamanna la bida. Engko’ ban ba’na kodu asokkor olle odhi’ neng e jaman kamardika’an.”
“Cokop jareya padaddi pangajaran. Baramma sopaja nagara reya ta’ ejaja pole e budhi are.”
“Iya, mon ba’na ban katoronanna pagi’ ta’ terro daddiya ponggaba, jareya peleyanna ba’na!”
“Iya enja’ keya. Banne padhana jareya, Pul!”
“Mon engko’ paggun adaptara daddi ponggaba. Odhi’ nyaman narema gaji dhari Pamarenta sabban bulan,” ca’na Sipul.
BACA JUGA
“Tape ba’na baramma se daddiya ponggaba? Ba’na la towa, ban omorra para’ pa’ polo taon.”
“Iya, engko’ gi’ ngantos bakto eyangkat, Dal.”
“Ngantos apa? Ca’na mon daddi ponggaba badha batessan omor!?”
“Jareya pole! Ba’na pola gi’ ta’ ngedhing kabar, ja’ sateya pamarenta badha program PPPK, erengkes kalaban sebbudan P3K?”
“Se emaksod P3K areya sala settong Ponggaba Pamarenta kalaban Parjanjian Kalakowan.”
“Enja’, engko’ ta’ tao.”
Ba’na kennal ya, ka pottre bine’na Pa’ Mardin.
“sapa?”
“Fila?”
“Iya, teppa’.”
“Rowa na’-kana’ se gi’ buruwan ngajar? asukwan keya. Tape bajjra ban jujuk eyangkat daddi ponggaba sateya!”
“Pojurra pole, oreng jareya ta’ etugas ka Polo,” ca’na Sipul.
“Dhu, nyamanna ya. Manda’a bungana reng towana!”
***
“Engko’ lakar tao, Dal! Saongguna oreng paggun bisa odhi’ maske ta’ daddi ponggaba. Bannya’ oreng se pojur ta’ kalaban ajalane kaodhi’an daddi ponggaba.”
“Arapa ma’ ba’na taker manomer settong kalakowan daddi Ponggaba?” saodda Pidal.
“Dal, mara pekker. Mon ta’ keng polana terro daddiya ponggaba, arapa mara, ma’ bannya’ oreng towa taker nabangngagi na’-potona asakola kantos akuliya?.”
“Iya, mon polana. Pangarebba paggun buru dha’ essa’.”
“Kan, iya. Tadha’ pole tojjuwanna rowa, paggun terro ana’na eyangkat daddi ponggaba, otaba olle kalakowan se pantes.”
BACA JUGA:
“Sabab, mon oreng ta’ andhi’ ijazah, rowa biyasana kalowana berra’ e budhi are. Padhana ngala’ dherrep, ban laen samacemma.”
“Bendher,” saodda.
****
Jaman lamba’ lakar ta’ bannya’ na’-kana’ kellar asakola ban pole kantos nerrosagi akuliya. Bandhana asakola abak raja. Kodu ajuwal tana ban moger kaju sangkolanna reng towana.
Tape mon bajjra daddi ponggaba, tanto odhi’na bakal ro’om ban molja.
“Soro sapa ba’na ambu daddi guru sukwan. Ja’ anowa ba’na kan la mardika daddi guru P3K!?” ca’na Sipul ka Pidal.
“Tamba Abit ngajar, tamba lekkas eangkat daddi guru ponggaba.”
Ngedhing careta dhari Sipul, Pidal akaton kasta ta’ sabbar se daddiya guru maske gun kocapana pera’ asukwan.
Fendi Chovi, babar e Songennep. Lebur nganggit careta. Pan-saponapan ongkas serradanna terbi’ daddi buku, ngombar e media ceta’ tor online. Eyatore akanca lebat sosial media Instagram @fendi.chovi
