E jaman mangken, bannya’ ca’-oca’ se esaloy angguyanna, kantos ta’ terrang artena se sanyatana, daddi ta’ jarna’ dha’ pamekkeran, ompama: beddha, sowak, dhuwas, sareng en-laenna. Sapaneka jugan monggu dha’ ca’-oca’an, akadi: parebasan, saloka, ca’-oca’an: paparekan, sendelan, paleggiran, bangsalan, parsemmon, lalonget.
Sajan abit saloyya sajan sara, taker para’ tadha’a bidana; mangka sanyataepon andhi’ ma’na bang-sebang sareng badha bidana. E dhalem tolesan paneka badan kaula namong nerrangngagiya artena oca’: parebasan, saloka sareng ca’-oca’an bisaos, sopaja namba’ana terrangnga pangarteyanna oreng se maos.
Parebasan, babasan, ca’-oca’an otaba cap-ocapan, enggapaneka sabarnana kabadha’an otaba oca’ se ta’ epasamon mabi opama, karana pajat kadaddiyan ongguwan, opama:
Etombak eosong; parebasanna oreng se acarok ban balana dibi’, saamponna sala settong kaler, tanto gi’ eosong sareng mosona gella’.
Kellar melle ta’ kellar ngangguy; ekoca’agi dha’ oreng sogi se ta’ toman guy-ngangguy sae, daddi gerra; sabab lalakon ongguwan badha oreng kowat melle pangangguy otaba ponapa saos se larang argana, marga dhari sogina, nangeng ta’ oneng mattrappagi, tebana daddi cacalen. Sapaneka saterrossepon.
Dineng saloka, artena sabarnana kabadha’an otaba oca’ se epasamon, opama kadi: te’-lette’ ngeret ronyangan ; te’-lette’ paneka keban kene’; ronyangan kapprana tekel aebuan kale rajana te’-lette’; gapaneka eeret, arte’epon badha e bingkengnga te’-lette’.
Daddi salokana pa-panopa se dha’-adha’na kene’, kabudhina raja. Mara bellu’ abangbang; bellu’ paneka lecen nyangsara pega’anna; mangka pas abangbang (andhi’ kalembang), oneng ngabber; daddi sajan malarat pega’anna; salokana oreng se ce’ penterra acaca, ta’ gampang kenneng sarekal. Sareng bannya’ pole laennepon.
Samangkenna oca’ parebasan sareng saloka ampon esaloy angguyanna, ta’ gampang se abidha’agiya; ka’imma se saloka, kaimma se parebasan. Daddi manabi kasokan ngaonengana da-bidana saloka sareng parebasan se kasebbut e dhalem buku paneka, enggi kodu ekagali dhingen artena.
21. Akantha pate’ kaaddhangan tete; ekoca’agi dha’ oreng se kaebuan pekker otaba bingong.
22. Akantha mendhem genji; ekoca’agi dha’ oreng se tatengkanna dak-mardik, rak-marek, mara se gila.
23. Akantha bu’-tambu’ (tep-kotep) cellot (lempong); ekoca’agi dha’ soroan se abit otaba se tadha’ katerrosanna (basana).
24. Akantha ajam ngerremme; ekoca’agi dha’ oreng se parappa’na anapso, rak-marek, dak-mardik, mak-ngamek.
25. Akantha macan abudhu’an; ekoca’agi dha’ oreng gendhak, parappa’na aseddhiyan.
26. Akantha potena tellor; salokana oreng se abasanna becce’ atena (alem), nangeng sanyatana juba’.
27. Akantha pete’ ngatela’e seka’; ekoca’agi dha’ oreng se talebat tako’
28. Akantha seka’ nyabut pete’ ; ekoca’agi dha’ partengka se ce’ gancangnga.
29. Akantha maleng kaseyangan; ekoca’agi ka oreng se abasanna enga’ oreng tako’, marga aba’na ngera, ja’ badha oreng tao dha’ salana otaba dusana.
30. Akantha juko’ kaasadhan aeng; ekoca’agi dha’ oreng se talebat mesken kakorangan sandhang pangan.
Saka’dhinto monyena anggidan dhalem serradan buku Saloka tor Parebasan Madura se eyanggit Kartosoedirdjo taon 1919 se tapongkor. Malar moga ngeba’a manfaat. Salam…
