Lèbât Progrâm AUTP, Rèng Tanè è Sampang Bisa Ollè Bhântowan Rp6 Juta Sabbhân Mosèm

NEWS, SAMPANG - 119 hèktar sabâ è Kabupatèn Sampang, Madhurâ, ollè asuransi tanè sè èkoca' Asuransi Usaha Tani Padi (AUTP). Tor-ator obâng (premi) asuransi ka'ḍinto sakabbhinna èbâjâri Pamarènta Jhâbâ Tèmor.

Tojjhuwânnèpon bâḍâna asuransi tanè  ka'ḍinto kaangghuy abhânto rèng tanè nalèka tamennanna bâḍâ sè ta' dhâddhi otabâ gâgâl panèn. Mèsal, ècapo' panyakè' (hama), ècapo' bhâlâi alam kadhiyâ bânjir tor laèn samacemma.

Orèng tanè bisa ngajuwâghi kon-akon asuransi tanè ka'ḍinto nalèka tamennanna bâḍâ sè ècapo' sala-sèttong bhâlâi sè ampon èsebbhuttaghi è attas. Saèngghâna, oreng tanè paḍâ lopot ḍâri rogi; poduksi tanè pagghun terros kalako.

Lora Bâgiyân (Lobâg) Tamennan Pangan tor Hortikultura Disperta KP Sampang, Nuruddin aḍhâbu, jhâ' saongghuna 119 hèktar sabâ è Sampang ampon maso' progrâm AUTP ka'ḍinto.

BACA VERSI BAHASA INDONESIA:

119 Hektare Sawah di Sampang Dapat Jatah Asuransi Pertanian, Biaya Premi Ditanggung Pemprov Jatim

"Ḍâri 119 hèktar jârèya, ongkos premi-na sè rajâna saratos bâllung polo èbu (Rp180 ribu) rowa, sakabbhinna ètangghung Pamarènta Probhinsi Jhâbâ Tèmor," ca'èpon Nuruddin, nalèka ètemmonè è rowanganna, Rebbhu tangghâl 24 April 2024.

"Bhuru satèya maghârsarè Sampang ollè progrâm rèya," èmbu salèrana langkong jhârna'.

Dhinèng carana adâptar, orèng tanè bisa jhujhuk ngajuwâghi bhântowan ka'ḍinto nalèka ampon ḍâpa' bâktona namen (masa tanam).

Bisa jughân èkalako kalabân abâ' dhibi'na rèng tanè bâng-sèbângnga (mandiri); ta' kalabân mènta bhântowan (subsidi) ḍâri pamarènta. Manabi saka'ḍinto, rèng tanè kodhu majâr ongkos prèmi dhibi' sè rajâna Rp180 èbu per hèktar sabbhân mosèm otabâ sataon sakalèyan.

"Mon la marè ngorus AUTP, sapa'a bhâi ḍâgghi' bisa ngako jhâ' tanèna rosak ongghu. Yâ mon ta' rosak, mèsalla asèl tanèna bhâghus, yâ pèssè otabâ ongkos premi sè saratos bâllung polo ghellâ' otomatis angos. Jângka bâktona yâ paḍâ, sataon otabâ samosèm," jhârna' salèrana.

BACA JUGA:

Kawin Suntik untuk Hewan Ternak di Sampang Tak Lagi Gratis, Ini Alasannya

Langkong jhârna' Lora Nuruddin ajhârbâ'âghi, manabi asèl tanèna rosak ongghu, yâktèna orèng sè pon lastarè adâptar AUTP bhâkal ollè bhântowan asuransi sè rajâna Rp6 juta per hektar.

"Dhâddhi jârèya sè bhâkal èkaollè mon tamennanna angghuta AUTP rosak ongghu pas èyakonè. Mèsal ècapo' bânjir, kerrèng, ècapo' panyakè' hama tor samacemma," ḍhabuna.

"Tapè sabellunna bhântowan Rp6 juta per hektar èpacaèr, ḍâgghi' jârèya bhâkal bâḍâ tim sè ètugâs kaangghuy toron ka bâbâ, maso' parlo èbhânto apa enjâ'," èmbu salèrana.

Sakadhâr parlo èkaghâli, progrâm Asuransi Tanè è Kabupaten Sampang kantos samangkèn lagghi' korang sè mènat. Orèng Sampang cora' korang passra manabi ghi' kodhu makalowar pèssè.

"Bânnya' sè ta' tao jhâ' progrâm AUTP rèya gârâtis. Maghârsarè bânnya' sè nyangka kodhu majâr, ta' enḍâ' mon ghi' soro makalowar pèssè, kajhâbhâna bâḍâ èmbuwân subsidi ḍâri pamarènta," totok ḍhabuna Lora Nuruddin.***