Caretana Asta Nyamplong

— Eyanggit sareng Tadjul Arifien R., Budayawan Songennep

E Disa Nyamplong, badha settong Asta (koburan kona) se kasebbut pasareyanna Adipoday otaba Asta Nyamplong, amarga gi’ lamba’ bannya’ bungkana nyamplongnga. Kacator se esareyagi e asta engga paneka se kasambat Adipoday sareng Potre Koneng.

Adipoday jugan kaonang kalaban jajuluk Pandhung Siluman otaba Arya Baribin se marenta Songennep e taon 1399 kantos 1415 enggun karaton e Polo Podhay (Sepudi).

Melana enyamae Sepudi, amarga dhari asal oca’ “Sepuh Dewe”—artena, paleng towa, polana agama Islam maso’ ka Madura (Songennep) lebat Podhay—daddi paleng ngadha’ (towa) Islamma, se ebakta sareng Sayyid Ali Murtada Sunan Lembayung Fadhal otaba se kasebbut Rato Pandhita, salerana kaka’na Sayyid Ali Rahmatullah otaba Sunan Ampel.

Rato Pandhita otaba Sunan Lembanyung Fadhal kaagungan pottra empa’, enggi paneka Sayyid Usyman Haji se kasambat Sunan Ngudhung, Sayyid Haji Utsman se kasambat Sunan Manyuran Mandalika, Tamenggung Pulangjiwa se kasambat Panemba’an Wirakrama sareng Nye Ageng Tandha rajina Sunan Kertayasa Sampang.

“

Sunan Ngudung ka’dhinto ramana Sunan Kudus se apotra Sayyid Amir Hasan otaba se kasambat Sunan Pakaos, se dhineng Salerana, ka’agungan potra se asmaepon Sayyid Ahmad Baidlawi otaba se kasambat Pangeran Katandur, somare e asta Sabu, Disa Bangkal, Songennep.

“

Sunan Manyuran adhadhuko e Mandalika, Lombok (NTB), melana pas kasambat Sunan Manyuran Mandalika. Salerana se toron ka Radin Bindara Dwiryapadha otaba se kasambat Sunan Paddusan, se ekapotra manto sareng Jokotole pas apotra Radin Tulis otaba se kasambat Pangeran Batopote kapeng settong.

Sunan Lembayung Fadhal ngagunge pottra se asmaepon Pulangjiwo, otaba Panemba’an Wirakrama—araji Dewi Maruratno dari Karaton Pajajaran pas kaagungan potra dhuwa’ enggi paneka Adipoday sareng Adirasa.

“

Adipoday, sa’amponna seda esareyagi e asta Nyamplong, dineng pasedana Adirasa esareyagi e Asta Karopo e polo Ra’as.

“

Adipoday se akarasmen sareng Potre Koneng ka’agungan potra dhuwa’, ka’agungan asma Jokotole sareng Agus Wedi. Jokotole ajuluk Raden Aryo Kujopanole Pangeran Secodiningrat III, jumenneng Adipati e Songennep taon 1415 kantos 1460 enggun karaton e Lapataman Dungke’.

Adipoday paneka se ngajari magarsare Poday bab carana ngobu tor arabat sape se sae tor samporna. Kantos sape e polo Podhay daddi gul-agulla sape sa Madhura, jugan se kantos kalonta dha’ manca nagara.

Sakeng ce’ emanna dha’ kabada’an Asta Nyamplong paneka ampon aoba ta’ kadi asta se sokkla, kantos ta’ bisa epanggi omorra bato kejing tor paesan se kona. Se aropa’agi dadinggalan karena situs sejarah.

Namong sanaos sadika’dhinto, gi’ bannya’ para magarsare dhari lowar polo Madura akadi dhari Situbanda, Bandabasa, Jember sareng salaenna, rabu kaangguy aziyarah dha’ pasareyan otaba Asta Nyamplong ka’dhinto.

Neng e pasareyan ka’dhinto gi’ badha pakakas sareng peyadhannepon Adipoday se gi’ erabat tor eparatene kantos mangken sareng panjagana akadi pasarrenan, paddasan tor gagaman akadi calo’ kodhi’, abinan sareng tombak.

“

Manabi para maos terro onenga, ngereng eyatore rabu dha’ Disa Nyamplong, Polo Podhay, Kabupaten Songennep.”

***