NEWS SUMENEP, Kè Munawi (61) ca’na ècapo’ tokol ta’mir masjid nalèka adâna sobbhu neng è Masjid Al-Basyir Kampong Komes Dhisa Montorna, Pasongsongan, Songennep, Salasa tanggal 30 Mei 2023.
Mènorot pangakona pottrèna, Sutila, bâjâ lagghu oca’na, eppa’na pajhât biyâsa èntar ka masjid jhâlâu’ kaangghuy adân tor abhâjâng ajâmaah.
Tèmpona kadhâddhiyân, satèbhâna è masjid, eppa’ jhujhuk ngala’ emmèk (miks) kaangghuy adân mèlana èkèra ampon ḍâpa’ bâktona Sobbhu.
“Tao-tao temmo èyalang bân ta’mir masjid jârèya, M (inisial), ca’na polana bâḍâ sè mènta ka abâ’na sopajâ ta’ adân polè è masjid jârèya,” totorra Sutila.
Sabellunna èpokol, oca’na materros carèta, Eppa’ ghi’ sempat atokar lèsan bân M sè la èlaporraghi.
“Tao-tao sèrana Eppa’ ca’na pas ètokol bân rèng jârèya sampè’ robbhu,” jhârna’ carètana.
Maos Jugan: Pagi’ Alas Bakal Daddi Kottha, Kottha Bakal Daddi Alas
Marè ètokol, sèraèpon reng seppona ca’èpon kantos ngalècèr ḍârâ, mèlaèpon lokana kantos asebbhit.
“Sèla tao robbhu, ta’mir jârèya ca’na ghi’ sempat nandhu’ roso’na tang Eppa’. Iyâ jhâ’ tang Eppa’ ella seppo nyamana yâ, iyâ taḍâ’ ghun neng-ngenneng, ta’ sempat alabân,” oca’na.
“Nèyaddhâ Eppa’ èntar kas masjid iyâ pèra’ karana terro, terro abhâjânga ajâma’ah,” sosolla.
Aḍhâsar kadhâddhiyân kasebbhut, korbân sareng sana’-bhârâjâèpon èntar alabhurân ka Polsek Pasongsongan. Kalabân èssè sorat labhurân: Dugaan Penganiayaan oleh M kepada Munawi (61) hingga menyebabkan luka serius.
Labhurân ghâpanèka atolès ḍâlem Laporan Polisi (LP) Nomor: LP/B/06/V/2023/SPKT/Polsek Pasongsongan/Polres Sumenep/Polda Jawa Timur, atanḍhâ tangghâl 30 Mei 2023.
“Poko’na orèng jârèya mandhâr èyokoma kalabân okoman sè berrâ’, ḍu arapa’a ca’na ma’ èntar nokol tang Eppa’, jhâ’ tang Eppa’ ta’ la-nyala, pèra’ èntara adân ma’ pas èlang-alangè,” ghumessel salèrana.
Kemmès bâ’âri’, 01 Juni 2023, ḍâḍâna Kè Munawi arassa seksek kantos sabhârunḍhut sana’ bârâjâèpon arassa tako’ tor kobâtèr. Saèngghâ kalagghuwânna, korbân èbhâkta ka Klinik Laboratorium Media LA Boras Pamekasan.
“Katerrangan ḍâri ḍukter sè nanganè asèl ellèbbhâ, oca’na bâḍâ bekkas bhentoran kajâ neng è roso’ ban tèng-entènganna, mangkana pas tapegghâ,” totorrèpon.
Maos Jhughân:
Ètanya’aghi ka Kapolsek Pasongsongan, AKP Muhammad Haqqul Musliminal Muachid ngâbâlâ jhâ’ abâ’na la narèma labhurânna korbân kaangghuy èpaterros.
“Sè masthè sèngko’ la narèma labhurân jârèya. Satèya la maso’ ka tahap penyelidikan bân pemanggilan saksi-saksi,” ḍhâbuna kalabân oca’ Indonesia.
Mantan Kapolsek Talango ka’ḍinto jhughân ampon ngèrèm sorat pemanggilan dâ’ ka ḍuorèng saksè kaangghuy èpèntaè katerranganna ngèngèngè kasus ḍugâ’ân penganiaya’an panèka.
“Palèng enjâ’ tello arè ḍâri satèya, kajhâbhâna saksè-saksè ghella’ lagghâng, maskèya ḍâtengnga lagghuna kèya ta’ arapa. Aḍhâsar SOP, antarana ḍuwâ’ kantos tello arè. Montorna (ḍâ’ enna’, red) kan abâk jhâu,” jhârna’ Salèrana.
Kapolsèk Muachid nambâi katerrangan, manabi ampon lastarè marèksa saksè-saksè, Salèrana ca’èpon bhâkal materros kantos tahap Gelar Perkara.
“Mon la asèlla pamarèksa’an èra-kèra ella cokop, bhuru pas ongghâ statussa Terlapor ka tahap penyidikan. Mon la ghenna’ sè jârèya, naè’ polè ka status Tersangka,” pongkas Salèrana.
Baca Juga:
Lawas Tapi Manis, Inilah 16 Pantus Lawas Bahasa Madura yang Kalian Cari
20 Kata-kata Bijak Bahasa Madura Filosofis Penuh Makna
NGODDHI: Berita ini diterjemahkan dari berita sebelumnya yang berjudul: “Ta’mir Masjid è Pasongsongan Diduga Aniaya Lelaki Paruh Baya Saat Hendak Adzan Subuh“ hanya untuk kepentingan konten.
