Pasera se Nemmo Aqua?

DIMADURA.ID – Pasera nyangka’a, na’-kana’ kalaheran Wonosobo paneka, pagi’ odhi’na kasohor menangka oreng se dha’-adha’ majaga pabrik aeng enom baddha’an: AQUA!

Mareksane dhari detik.com, oreng se dha’-adha’ nemmo aeng baddha’an merk Aqua asmaepon enggi ka’dhinto Tirto Utomo. Babar neng e Wonosobo Jaba Temor, teppa’ e tanggal 8 Maret 1930.

Pasera se ta’ onenga ka AQUA? Aeng enom baddha’an se dhalem basa Indondesia ekoca’ air minum dalam kemasan (AMDK) ampon kalonta, ta’ coma neng e Indonesia, namong jugan dha’ sagara manca.

Dhari sakeng kalontana, naleka magarsare dhisa entar melleya aeng enom, ponapa’a bisaos merk-ga, biyasana laju ngoca’: “Melleya Aquana!“

Saka’dhinto, aeng enom baddha’an merk Aqua onggu ce’ kalontana monggu dha’ magarsare Indonesia, dhari kottha raja kantos dha’ sa-dhisa gunong bato kaletthak.

Aeng Aqua gapaneka egarap sareng PT Aqua Golden Mississipi. Pabrik se epajaga Tirto sareng ale’epon, Slamet Utomo, gapaneka kacathet menangka pabrik aeng enom baddha’an paleng raja tor paleng towa e pasar Indonesia.

Biografi Tirto Utomo

Kadiya etokel Detik dhari Biografiku, Salasa (20/9/2022), Tirto Utomo nedda’ tana kampus alias asakola neng e Universitas Gadjah Mada, Surabaya, ra-kera taon 1954. Tirto Utomo asakola sambi alako daddi wartawan Jawa Pos.

Namong ropana tempo gapaneka, Tirto Utomo gi’ ta’ pate penter ngator bakto; magi bakto antara alako ban asakola. Saenggana jujuk Tirto amasteyagi dha’ aba’na kaangguy ngalle sakola’an. Lerres e taon 1959, Tirto tolos ngalle ka Fakultas Hukum Universitas Indonesia.

Baca Juga: Banyak Tumbuh di Madura, Ternyata Ini Nama Latin dan Manfaat Buah Keng-malengan

Paggun barenteng dha’ bur-leburanna, sambi asakola (kuliah), Tirto Utomo paggun daddi tokang toles (wartawan), bali’ ongga daddi Pimpinan Redaksi harian Sin Po tor majalah Pantja Warna.

Namong e taon gapaneka jugan (1959), Tirto epa’ambu daddi Pimpinan Redaksi harian Sin Po. Gajina pon tanto tekkor, saenggana kabadha’an gapaneka apanggibat dha’ bang-obangan kaangguy bajaran sakola’anna.

Ta’ nyorot ngadhebbi kabadha’an, Tirto paggun barenteng kodu tammat, kodu totok nemba elmo neng e Universitas Indonesia.

Olle Pangkat Sarjana

Totok onggu! Lerres e taon 1960, Tirto Utomo olle pangkat menangka Sarjana Hukum tor jujuk alamar kalakowan neng e Permina (Perusahaan Minyak Nasional), samangken Pertamina.

Katarema, Tirto Utomo epalako neng e Pangkalan Brandan. Tirto barenteng tor bajeng. Pangkadda terros sajan tenggi kantos kaparcaja daddi Deputy Head Legal tor Foreign Marketing.

Esebbuttagi neng e dhalem buku ’50 Great Bussines Ideas form Indonesia’ anggidannepon M. Ma’ruf, Tirto Utomo daddi Deputy Head Legal dan Foreign Marketing Pertamina ngabidi taon 1971.

Ecareta’agi, bakto gapaneka Pertamina se eseppowe Tirto bakal katamoyan oreng manca. Tirto ampon lastare anegosiasi kontrak sareng sala settong perusahaan e Amerika Serikat.

Namong tebana, negosiasi gapaneka salsal melana sala settong tamoyya temmo aserro sake’ tabu’.

Tamoy gapaneka lerres rajina sala settong lora dhari Amerika. Erus-urus, tamoy gella’ ropana sake’ tabu’ polana ngenom aeng matta se eyangka’agi Pertamina.

Tirto mekker. Tirto olle pokeddan jha’ oreng lowar paneka tanto ta’ biyasa ngenom aeng matta. Oreng manca tanto adha’ar ta’ saromban aeng enom. Banne aeng somor otaba somber, bali’ aeng enom steril, aeng mineral se ampon esareng kantos benneng sokkla.

Ta’ ambu gan gapaneka, Tirto terros moter cethak nyare tareka kadiponapa carana nyadhiya’agi aeng enom bagus segger, bisa eyenom pasera’a bisaos.

Kala’ lekkas, Tirto pas nyoro ale’na mangkat ka Thailand sopaja ngabdi neng e Perusahaan Polaris, ajar cara maddhain aeng ka butol.

Sa’amponna bubar dha’ Indonesia, abakta obang ollena alako neng e perusahaan ka’dhissa’, Tirto sareng Slamet ale’na jujuk majaga pabrik neng e Bekasi, Jakarta, lerres e taon 1973, kalaban nyama PT Golden Mississippi.

Dulluna, AQUA paneka anyama PURITAS, kantos kengeng pamanggi dhari sala settong konsultan Indonesia, Eulindra Lim,  sopaja produk PT Mississippi eberri’ nyama AQUA. Alasannepon, salaen AQUA pajat andhi’ arte aeng jugan gampang oca’anna.

Salaenna ka’dhinto, Tirto Utomo pajat andhi’ jajuluk otaba nyama samaran ‘A Kwa’, para’ mepet ka AQUA. Jajuluk gapaneka kasambit dha’ nyama dagingngepon Tirto, Kwa Sien Biauw, nyama se seggut eyangguy nalekana daddi Pemred harian Sin Po tor majalah Patja Warna, lerres e taon 1950.

Produk AQUA ceptaannepon Tirto sareng ale’na Slamet Utomo paneka elaunching (epakalowar) kalaban ropa aeng butolan dhari kaca, okoran 950 ml, argana Rp 75 per botol.

Lerres e tempo gapaneka, enoman karbonasi kadiya Cola Cola, Sprite, 7 Up, dan Green Spot pareppa’na ce’ kalontana neng e Indonesia. Kasempadan monggu dha’ Tirto kaangguy makennal bisnissepon: ajuwal aeng ceya mineral, aeng pote ta’ abarna tor tadha’ rassana.

Gila ca’na oreng, tapr lares tor paju neng e pasaran, kantos Tirto Utomo motossagi kaangguy pensiun dini (ambu) dhari PT Pertamina.

Pelopor  Perusahaan AMDK neng Indonesia

Tirto Utomo kabilang menangka pelopor perusahaan AMDK neng e Indonesia. Maskeya lako ecokoco tor eyanggep gila ban sakanca’anna, nyatana Tirto bajjra tor rajja. Kantos langkong 10 taon, Tirto materros bisnis paneka kalaban majaga pabrik se sapesan neng e Pandaan, Jaba Temor.

Akherra, e taon 1985, AQUA dhateng kalaban ropa baddha’an butol palastek kene’ (PET) okoran 220 ml. Transformasi AQUA okoran mini eyanggep langkong sae tor aman kaangguy ekonsumsi oreng bannya’.

Daur Ulang Butol AQUA

E taon 1990, AQUA ngajuwagi settong pamanggi neng e bursa saham Indonesia kalaban bul-ombul “initial public offering” otaba IPO. Kantos e taon 1993, AQUA grup terros ajalannagi program “Aqua Peduli”, enggi ka’dhinto kalaban daur ulang botol plastik baddhana AQUA; butol se ella mare ekabaddha tor totok ekonsumsi enggala bisa eguna’agi pole.

Dhu taon ajalan, AQUA Grup kacathet menangka produsen air mineral pertama se nerrappagi sistem produksi in line neng e pabrik Mekarsari.

Produksi in line maksottepon sistem proses otaba cara maddhain aeng Aqua se elakone areng-sareng. Saka’dhinto, sistem paneka kasohor kantos sanonto. AQUA se baru ekagabay bisa eyesse’en aeng enom li-baliyan namong jau dhari sedding tanangnga manossa, saenggana aeng enom gella’ tettep higienis ka’angguy edha’ar.

Daddi Saham Bersama

E taon 1998, PT Mississippi lebat Danone Asia Holding Pte. Ltd saroju’ daddi minority shareholder tor majaga aliansi sareng PT Tirta Investama tor Danone. E taon gapenaka, mayoritas saham PT Aqua Golden Mississippi eyakuisisi sareng perusahaan multinasional asal Prancis, Danone Asia Holding Pte.

Namong saka’dhinto, Tirto Utomo menangka pendiri Aqua tettep neggu’ saham neng AQUA lebat PT Tirta Investama, se ka’dhimma PT Tirta Investama, PT Aqua Golden Mississippi tor PT Tirta Sibayakindo saroju kaangguy nyettong menangka Grup Aqua.

Tirto Utomo seda lerres e taon 1994. Orengnga adinggal, namong nyama tor bajjrana terros rajja kantos samangken.***