GHÂNCARAN DIMADURA — Paramaos ba’ emoda, baramma leburra lamba’ ajalan sakanca’an, amaen areng-bareng nyare wa’-buwa’an, ka tengnga teggal, ka but-ombut sambi nyare jangkrek, loppa bakto, dala ngalas kantos dhapa’ ka nong-gunong. Haha…
Enggi, e baba paneka pan-saponapan nyamana wa’-buwa’an se kaonang e Madura, dullu, otamaepon monggu reng Songennep. Nyamana wa’-buwa’an paneka, tanto agindhu’ bangen pangalebur monggu ngangodhadan se babar taon 1980-an.
Oddi sorne’agi babirji’ nyamana wa’-buwa’an e baba paneka. Ra-kera, ponapa pole wa’-buwa’an laen se gi’ ta’ esebbutagi sareng dan kaula? Oddi jugan komen e baba’anna gancaran paneka kalaban ngesse’e asma, email tor komentar paramaos!
1. Yor-nyèoran
2. Sannèk
3. Nèr-mennèran
4. Rantèma otabâ Morbèy (Blue Berry)
5. Rokem
6. Burnè
7. Billâ
8. Bukkol
9. Bhâlimbing Polo (kènè’, bânnya’ tombu è Pagerrungan Rajâ)
10. Kanèdhu
11. Lèng-malèngan
12. Dhuwalâ’
13. Ruk-jerrughân buwâna bunsai
14. Kalampok
“Kalampok kalambibing, oreng kopok ya ta’ ngedhing, haha…”
15. Kokon, buwâna kaju kokon
16. Bir-galâmbiran
17. Sokon
18. Bungkol buwâna mangrup (mangrove)
19. Calamèrè (cermai, carètana rèng Polo Saor, Songennep)
20. Ghâddhung ghunong
21. Kosambhi, tor laènna..
Samangken, na’-kana’ ngangodhadan ampon ta’ koceberran dha’ wa’-buwa’an kasebbut. Na’-kana’ samangken ampon aleburan ka jajan belliyan.
Manabi lamba’, na’-kana’ ngodha, sadhatengnga asakola, sakanca’an padha kaburu se asalena, pas mangkat akalenjar ngalas ka nong-gunong–nyare bukkol, mele rokem, ngalacat nae’ metthek buwana duwa’.
Bila la kaso, toron ka baba, mandhi areng-bareng e songay. Kadhang enggi sabelluna mandhi, laggi’ sempat agabay o-paraowan dhari pappana geddhang. Dala kero’ kole’ bang-sebangnga se abegga neng e songay.
Amaen lem-sellemman, araga babatorra songay nyare barang. Bila nemmo barang se arga, peragga adhu tadha’ padha. Kadhang nemmo pesse, nemmo sosocan, enggi mon ekapojura kadhang pas nemmo gibang ban anteng andhi’na babine’an se gaggar tempo nyassa, otaba tempo ngorba kalambina neng e songay.
Lebur onggu bila enga’ ta’ enggi!
***
Oretan: Moh Sumardono
