News, DIMADURA, Pimpinan Cabang Ikatan Sarjana Nahdlatul Ulama (PC ISNU) Kabupaten Sumenep, Madura, adhu’um atosan sembako ḍâ’ maghârsarè Songennep sè èyangghep korang mampo.
Lora PC ISNU Sumenep, Dr KH M Husnan A Nafi’ adhâbu, jhâ’ program ka’ḍinto jhekjhek èlaksana’aghi sabbhân taon, sabbhân bulân Ramadân.
“Ampon dhâddhi kawâjibhân mongghu bhâdhân kaulâ sadhâjâ kaangghuy ngatorraghi ponapa sè bisa èyatorraghi ḍâ’ maghârsarè sè korang mampo,” ḍhâbuna, tèmpo nyeppowè rapat Pra Raker neng è Graha Pers Sumenep, Satto tangghâl 8 April 2023.
Salèrana aparnyo’onan, malar moghâ bhântowan ka’ḍissa’ bisa ongghu mèghunanè ḍâ’ maghârsarè korang mampo sè ampon narèma bhântowan ḍâri PC ISNU Sumenep.
Maos Jhughân: Bupati Sumenep Nganggârraghi Rp 544 juta kaangghuy Maghârsarèna sè Alako ka Lowar Madhurâ
“Malar moghâ bhântowan sè ta’ saponapa ka’ḍinto bisa dhâddhi manfaat ḍâ’ sè ampon narèma,” ḍhâbuna.
Lora PC ISNU sè jhughân nyeppowè IST Annuqayah Guluk-guluk ka’ḍissa’ nambâi jhâjhârbâ’ân ngèngèngè pakon mongghu maghârsarè ISNU, èngghi ka’ḍinto kasarjânaan tor kagiyatan-kagiyatan sè anowansa intelektual.
“Saka’ḍinto, dhâddhi ta’ kennèng panglo manabi kegiatanna ISNU ta’ show of force, ta’ paddhâng jhâ’ pon alako ponapa bisaos. Sanajjân saèstona bhâdhân kaulâ sadhâjâ ampon abhâlângajâi pan-saponapan kegiatan khas ISNU,” jhârna’ salèrana.
Salèrana mènangka lora PC ISNU Sumenep maḍâpa’ bhârenteng sajjhâèpon, sopajâ ca-kanca ISNU ongghu bisa mèghunanè, nebbhâr manfaat mongghu maghârsarè Sumenep lèbât program-program sè bhâḍhi èparanta lebbhâr bulan pasa taon mangkèn.
Maos Jhughân: 3 Tantangan Besar Ini Jadi Acuan Program PC ISNU Sumenep 2023-2026
Kalabân sajjhâ makowat kalembagaan, rajâ arebbhânna Lora Moh Husnan A Nafi’ sopajâ ḍâ’ buḍi arè ISNU bisa maongghâ dhârâjât tor kajhumantreman maghârsarè Sumenep.
“Dhâddhi ḍâ’ buḍi ka’ḍinto, bhâdhân kaulâ sadhâjâ bhâḍhi toron ka bâbâ, toju’ sareng maghârsarè Sumenep, abhâk-rembhâk ponapa bisaos ra-kèra kabhutowanna maghârsarè Sumenep. Saè parkara ekonomi, kaaghâmaan, eḍukatif tor parkara-parkara laènnèpon,” tegghes salèrana.
Sè pongkasan, Lora Husnan masthèyaghi jhâ’ rapat Proker PC ISNU Sumenep bhâḍhi kalampan lastarè arè tellas 1444 H, bulan Mei sè bhâkal dâteng.
Ponapa sè èjhârbâ’âghi è aḍâ’ ghellâ’ èngghâl dhâddhiyâ ghâmbhârân kadhiponapa porgram sè bhâḍhi kalampan ḍâlem sèttong periode.
“Saka’ḍinto, malar moghâ bhâdhân kaulâ sadhâjâ èparèngana bârâs salamet, kèngèng bârokaèpon ulama, saèngghâ bhâdhân kaulâ bisa nambâi rassa pangabhâktè ḍâ’ jam’iyah Nahdlatul Ulama,” pongkas salèrana.***
