SALOKA TOR PAREBASAN MADURA 04

PANGKÈNG SASTRA, DIMADURA – E baba paneka 20 Conto Parebasan tor Saloka Madura terrosanna gancaran sabellunna, nokel dhari bugu anggidanna Kartosoedirdjo (1919).

Paramaos se laggi’ ta’ mokka’, eyatore bukka’ gancaran sabellunna kalaban mece’ link ka’dhinto: Saloka tor Parebasan Madura Bab 03.

31. Akantha anggu’ ta’ epece’; ekoca’agi dha’ oreng se ta’ kan-ngakan otaba oreng se abit anganga bai.

32. Akantha me-eme; ekoca’agi dha’ oreng alake-bine se ce’ rokonna otaba ce’ asena, pejer atong-rontong.

33. Akantha kaddhal labu; ekoca’agi dha’ oreng se ce’ mengnga’na, otaba dha’ oreng se ngas-balingasan (nga’-jinger) marga tacengnga’.

34. Akantha eggung tema; ekoca’agi dha’ oreng se jeppen, larang oca’na.

Baca Juga:

Mo’-Ngomo’ Bahasa Madura

35. Akantha po-sapo poret; ekoca’agi dha’ oreng lames, kabbi epenta’a.

36. Akantha gerrangnga ras-karas; ekoca’agi dha’ oreng se talebat koros.

37. Akantha lerengan; ekoca’agi dha’ oreng se talebat koros.

38. Akantha pate’ bi’ koceng; ekoca’agi ka oreng ataretan, alake bine otaba akanca se ta’ atong, pejer acaka.

39. Akantha gadebbung busso’ ; ekoca’agi dha’ oreng se la tadha’ pangambriyanna sakale.

40. Akantha calo’ eanggari; ekoca’agi dha’ tatengkan se ta’ pantes, agabay gella’na oreng.

41. Akantha jangkang olo’; ekoca’agi dha’ oreng se lembe’, ta’ andhi’ kakowadhan tor dhur-gedduren.

42. Akondhang babajangan; artena akanca babajangan (jang-bajangan); ekoca’agi dha’ oreng se ajalan bi’-dibi’an.

43. Akantha sa’ar gerrana; ekoca’agi dha’ oreng se gerra sarta kasar pangoca’na. (sa’ar oca’ Madura bara’, artena lentena edduk, ce’ gerrana. Sa’ar oca’ Madura temor, artena ampassa kopi se mare eadune).

44. Akantha kabra ekakan pate’; ekoca’agi dha’ oreng raddin tor bangsa agung, noro’ patona reng dhume’ tor juba’ robana.

45. Akantha kabra ekakan koceng; ekoca’agi dha’ oreng raddin alake oreng ta’ tao adat.

46. Ako’-coko’ tae; ekoca’agi dha’ oreng se kaotara juba’ kalakowanna, nangeng gi’ daddi ngarane juba’ dha’ oreng laen.

47. Akarja ta’ nabbu; ekoca’agi dha’ oreng bine’ nyam-ngaronyam, gigir sarombanna.

48. Akakanan daging baras; ekoca’agi dha’ oreng juba’ se ngajak akanca oreng ce’-becce’; dhi-budhina lalakon oreng se akanca jareya noro’ melo okomanna dusana oreng se juba’ gella’.

49. Akopa’ ta’ nombuk; ekoca’agi dha’ oreng se noro’ ngarembak pa-apa nangeng ta’ lowang sombangan.

50. Akodhung kole’na macan; salokana oreng se ngalakone panggabay, apadalian oreng se neggu’ pangobasa otaba oreng sogi.

Saka’dhinto. Gagimpo’ conto 20 parebasan tor saloka Madura e attas gapaneka esalen dha’ ejaan asel sarasehan 1973 sareng salerana Tadjul Arifien R. Malar moga manfaat. Salam..